Cambodian Red Cross - assisting the vulnerable though the provision of health services, disaster management and promotion of humanitarian values.

សម្ដេចព្រះរាជមាតាជាតិខ្មែរយាងចែកព្រះរាជអំណោយ ដល់ប្រជារាស្ដ្រក្រីក្រ ៥១៤គ្រួសារ នៅខេត្ដកំពង់ស្ពឺ

កាលពីថ្ងៃទី ០៤ មេសា លោកជំទាវបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងលោកជំទាវជាភរិយា ឥស្សរជនក្នុងរាជរដ្ឋាភិបាល និងរដ្ឋសភាបានអញ្ជើញអមព្រះរាជដំណើរ សម្ដេចព្រះវររាជមាតាជាតិខ្មែរ ព្រះប្រធានកិត្តិយស កាកបាទក្រហម កម្ពុជា យាងចុះសួរសុខទុក្ខ និងចែកព្រះរាជអំណោយ ជូនដល់ប្រជារាស្ត្រចំនួន ៥១៤គ្រួសារ មកពីឃុំព្រៃវិហារ និងឃុំមហាឫស្សី ក្នុងស្រុកគងពិសី ខេត្តកំពង់ស្ពឺ ។ ព្រះរាជអំណោយទាំងនោះក្នុងមួយគ្រួសារទទួលបាន អង្ករ ៣០គ.ក,ត្រីខ ១០កំប៉ុង, មីខ្មែរយើង ១កេស, សារុង ១, ក្រមា ១, នំប៉័ងបាក់យ៉ុង ២ដើម, ទឹកបរិសុទ្ធ ឱរ៉ាល់ចំនួន ២ដប, និងថវិកាចំនួន ៥ម៉ឺនរៀល ។ សរុបជាថវិការប្រមាណ ៖ ២៨៧៥៥,១២ដុល្លា ដែលជាថវិកាទទួលបានពីសប្បុរសជន។ អញ្ជើញមានប្រសាសន៍ក្នុងឱកាសនោះ ឯកឧត្ដម កង ហាង អភិបាលខេត្ត និងជាប្រធានកិត្តិយស សាខាកាកបាទក្រហមកម្ពុជា ខេត្តកំពង់ស្ពឺបានថ្លែងទូលថ្វាយ សម្ដេចព្រះមហាក្សត្រព្រះវររាជមាតាជាតិខ្មែរ និងជម្រាបពីសកម្មភាព ដែលកាកបាទក្រហមខេត្តបាននិងកំពុងអនុវត្ដដោយបានសហការជាមួយអាជ្ញាធរគ្រប់លំដាប់ថ្នាក់ ចុះជួយប្រជារាស្ត្រដែលរងគ្រោះដោយមហន្តរាយផ្សេងៗ បានទាន់ពេលវេលាដូចជា ភ្លើងឆេះផ្ទះ ខ្យល់ព្យុះ រន្ទះបាញ់ ចាស់ជរាគ្មានទីពឹង អ្នកផ្ទុកមេរោគអេដស៍ អ្នកជំងឺអេដស៍ និងកុមារកំព្រា ដែលឪពុកម្ដាយស្លាប់ដោយមេរោគអេដស៍ ជនពិការនិងជនទីទាល់ក្របំផុត ដោយសារគ្រោះរាំងស្ងួត។ បន្ទាប់ពីបានព្រះសណ្ដាប់រួចមក សម្ដេចម៉ែ បានមានព្រះសុវណ្ណីពាំនាំព្រះរាជបណ្ដាំសួរសុខទុក្ខពី សម្ដេចឪ សម្ដេចតា សម្ដេចតាទួត ដែលជានិច្ចកាល ព្រះអង្គតែងមានព្រះទ័យ គិតគូរដល់សុខទុក្ខរបស់ប្រជារាស្ត្រ និងតាមរយៈព្រះទ័យនេះ ព្រះអង្គបានកសាងសមិទ្ធផលមួយ ចំនួនបម្រើបងប្អូនប្រជារាស្ត្រនៅទីជនបទដាច់ស្រយាល តាមរយៈក្រុម សម្ដេចឪ ដែលមានសម្ដេចចៅហ្វាវាំង គង់ សំអុល ជាប្រធាន ដូចជា ជួយកសាង ស្រះទឹក អណ្ដូងទឹក ផ្លូវលំ មណ្ឌលសុខភាព និង អាគារសិក្សា ។ ជាមួយគ្នានោះ សម្ដេចម៉ែ បានថ្លែងកោតសរសើរ លោកជំទាវបណ្ឌិតប្រធាន និងបុគ្គលិកស្ម័គ្រចិត្ត កាកបាទក្រហមកម្ពុជា ដែលតែងតែសកម្មជានិច្ច ក្នុងការចុះជួយដល់ប្រជារាស្ត្ររងគ្រោះ មានទុក្ខលំបាក ខ្វះខាតនៅគ្រប់ទីកន្លែងទាន់ពេលវេលា ហើយដែលភាគច្រើន កាកបាទក្រហមកម្ពុជា មានវត្តមានចុះជួយសង្គ្រោះ ប្រជារាស្ត្របានមុនរាជរដ្ឋាភិបាលទៅទៀត។ សម្ដេចម៉ែ មានព្រះសុវណ្ណីបន្តថា ជោគជ័យរបស់កាកបាទក្រហមកម្ពុជា មានជាបន្តបន្ទាប់មកនេះ អាស្រ័យដោយភាពឈ្លាសវៃរបស់ លោកជំទាវ បណ្ឌិត ប៊ុន រ៉ានី ហ៊ុនសែន ជាប្រធាន ដែលពូកែក្នុងការដឹកនាំ ចលនាមហាជន ប្រមូលផ្ដុំបានកម្លាំងមនុស្សធម៌ ទាក់ទាញបានការចូលរួម យ៉ាងសកម្ម ពីសប្បុរសជន ក្នុងនិងក្រៅប្រទេស ធ្វើឱ្យកាកបាទក្រហមកម្ពុជា មានធនធានជួយសង្គ្រោះប្រជារាស្ត្រ បានគួរឱ្យកត់សំគាល់ ។

សូមអរគុណ !

ធ្វើបច្ចុប្បន្នភាព ថៃ្ងទី 16 ខែ មិថុនា ឆ្នាំ២០១០