Cambodian Red Cross - assisting the vulnerable though the provision of health services, disaster management and promotion of humanitarian values.

ព្រះរាជអំណោយរបស់ព្រះមហាក្សត្រ សម្ដេចឪ សម្ដេចម៉ែ ចែកជូនដល់ជនចាស់ជរាគ្មានទីពឹង និងប្រជារាស្ដ្រក្រីក្រ នៅខេត្ដកំពង់ឆ្នាំង

កាលពីថ្ងៃទី ១០ ខែ មេសា ឆ្នាំ ២០១០ សម្ដេចព្រះវររាជមាតាជាតិខ្មែរ ព្រះប្រធានកិត្ដិយសកាកបាទក្រហមកម្ពុជា ដោយមាន លោកជំទាវបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងលោកជំទាវជាភរិយា ថ្នាក់ដឹកនាំ អញ្ជើញដង្ហែអមព្រះរាជដំណើរបានយាងប្រទានព្រះរាជអំណោយ ជាព្រះរាជឧបត្ថម្ភ នៃព្រះករុណា ព្រះមហាក្សត្រ សម្ដេចឪ សម្ដេចម៉ែ ដែលរៀបចំដោយ កាកបាទក្រហមកម្ពុជា ដល់ប្រជារាស្ត្រចំនួន ៥០៤គ្រួសារ មកពីស្រុកសាមគ្គីមានជ័យ និងស្រុក កំពង់ត្រឡាច ខេត្តកំពង់ឆ្នាំង។ ព្រះរាជអំណោយដែលក្នុង ១ គ្រួសារទទួលបានដូចជា ៖ អង្ករ ៣០គ.ក ត្រីខ ១០កំប៉ុង មីខ្មែរយើង ១កេស សារុង១ ក្រមា១ នំប៉័ងបាក់យ៉ុង២ដើម ទឹកបរិសុទ្ធ ឱរ៉ាល់ ចំនួន ២ដប និងថវិកាចំនួន ៥ម៉ឺនរៀល សរុបជាទឹកប្រាក់ ២៨.២០១,៣២ ដុល្លារ។ ក្នុងព្រះរាជពិធីប្រទានព្រះរាជអំណោយ ឯកឧត្ដម ទូច ម៉ារីម អភិបាលនៃគណៈអភិបាលខេត្តកំពង់ឆ្នាំង និងប្រធានកិត្តិយស សាខាកាកបាទក្រហមកម្ពុជា ខេត្តកំពង់ឆ្នាំង បានទូលថ្វាយព្រះអំណរគុណចំពោះព្រះវត្ដមាន សម្ដេចម៉ែ និងលោកជំទាវបណ្ឌិត ប៊ុន រ៉ានី ហ៊ុនសែន និងភរិយាថ្នាក់ដឹកនាំគ្រប់រូប ដែលបានយាង និងអញ្ជើញដល់ឃុំកំពង់ត្រឡាច ស្ថិតនៅមាត់ច្រាំងទន្លេសាប ក្នុងបេសកកម្ម សាកសួរសុខទុក្ខ និងប្រទានព្រះរាជអំណោយសប្បុរសធម៌។ មានព្រះសុវណ្ណីក្នុងឱកាសនោះ សម្ដេចម៉ែ បានថ្វាយព្រះអំណរគុណ និងកោតសរសើរចំពោះ លោកជំទាវបណ្ឌិត ប៊ុន រ៉ានី ហ៊ុនសែន ដែលតែងតែយកចិត្ដទុក ដាក់ដល់សុខទុក្ខប្រជារាស្ត្រ និងបានប្រទានដល់ព្រះអង្គនូវឱកាសបានមកជួបសួរសុខទុក្ខកូនចៅ ដោយពាំនាំព្រះបណ្ដាំសាកសួរសុខទុក្ខពី សម្ដេចឪ និងព្រះករុណា ព្រះមហាក្សត្រផង។ សម្ដេចព្រះមហាក្សត្រី ព្រះវររាជមាតាជាតិខ្មែរ ព្រះអង្គសព្វព្រះរាជហទ័យ ថ្លែងនូវការកោតសរសើរ ចំពោះការខិតខំប្រឹងប្រែងរបស់ រាជរដ្ឋាភិបាល ដឹកនាំដោយ សម្ដេចអគ្គមហាសេនាបតី តេជោ ហ៊ុន សែន ធ្វើឱ្យប្រទេសជាតិបានសុខសន្តិភាព មានការរីកចំរើន ហេដ្ឋារចនាសម្ព័ន្ធត្រូវបានកសាងឡើង ព្រោងព្រាតមាន ស្ពាន ថ្នល់ សាលារៀន មន្ទីរពេទ្យ ប្រព័ន្ធធារាសាស្ត្រនៅគ្រប់ទីកន្លែង។ ប៉ុន្តែទោះបីជាបែបនេះក្ដីក៏នៅមាន កាកបាទក្រហមកម្ពុជា របស់បងប្អូនប្រជារាស្ត្រជារៀងរហូត ក្នុងខណៈពេលដែល រាជរដ្ឋាភិបាលបច្ចុប្បន្ន កំពុងតែរែកពុនភារកិច្ច កសាងប្រទេស និងការពារបូរាណភាពទឹកដី។

សូមអរគុណ !

ធ្វើបច្ចុប្បន្នភាព ថៃ្ងទី 16 ខែ មិថុនា ឆ្នាំ២០១០