Cambodian Red Cross - assisting the vulnerable though the provision of health services, disaster management and promotion of humanitarian values.

សម្ដេចព្រះវររាជមាតាជាតិខ្មែរ យាងចែកអំណោយដល់ ចាស់ជរាគ្មានទីពឹង និងប្រជារាស្ដ្រក្រីក្រចំនួន ៥៣១ គ្រួសារ នៅខេត្ដកំពង់ចាម

កាលពីថ្ងៃទី ០៥ ខែ ឧសភា ឆ្នាំ ២០១០ សម្ដេចព្រះវររាជមាតាជាតិខ្មែរ បានអញ្ជើញ សាកសួរសុខទុក្ខប្រជារាស្ដ្រ និងចែកអំណោយដែលពេលនោះ អមព្រះរាជដំណើរ លោកជំទាវ បណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងលោកជំទាវថ្នាក់ដឹកនាំ ជូនដល់ជនចាស់ជរាគ្មានទីពឹង និងប្រជារាស្ដ្រក្រីក្រ ចំនួន ៥៣១ គ្រួសារ មកពីឃុំចំនួន ១០ ស្ថិតក្នុងស្រុកជើងព្រៃខេត្តកំពង់ចាម។ ព្រះរាជអំណោយដែលយកទៅចែកជូន ទាំងអស់នោះក្នុងមួយគ្រួសារទទួលបាន អង្ករ ៣០ គ.ក មីយើង ១ កេសតូច, ត្រីខ ១០ កំប៉ុង, សារុង ១, ក្រមា ១, មុង ១, ភួយ ១, នំប៉័ងបាក់យ៉ុង ២ដើម, ទឹកឱរ៉ាល់ ២ដប និងថវិកា ៥ម៉ឺនរៀល។ សូមរំលឹកដែរថាព្រះរាជសកម្មភាពចែកអំណោយទាំង ៤ លើកនេះបាន ចំនួន ២១៦១ គ្រួសារ ដែលក្នុងនោះ លើកទី១ ជូនដល់ប្រជារាស្ត្រ ៥១៤ គ្រួសារ នៅខេត្តកំពង់ស្ពឺ, លើកទី២ ជូនដល់ប្រជារាស្ត្រ ចំនួន ៥០៤ គ្រួសារ នៅខេត្ដកំពង់ឆ្នាំង, លើកទី៣ ជូនដល់ប្រជារាស្ត្រ ចំនួន ៦១២ គ្រួសារ នៅខេត្តកណ្ដាល និងលើកទី៤ ជូនប្រជារាស្ត្រ ចំនួន ៥៣១ គ្រួសារ នៅខេត្តកំពង់ចាម។ នៅក្នុងឱកាសនេះផងដែរ ឯកឧត្ដម ហ៊ុន ណេង អភិបាលគណៈអភិបាលខេត្ត និងជាប្រធានកិត្តិយសសាខាកាកបាទក្រហមកម្ពុជាខេត្តកំពង់ចាម បានឡើងទូលថ្វាយ នៅសកម្មភាពមនុស្សធម៌ ដែលសាខាខេត្តបានធ្វើកន្លងមកថ្វាយចំពោះ សម្ដេចម៉ែ ជាមួយគ្នានោះ ឯកឧត្ដម អភិបាលខេត្តបានថ្លែងអំណរគុណ យ៉ាងជ្រាលជ្រៅចំពោះលោកជំទាវបណ្ឌិត ប៊ុន រ៉ានី ហ៊ុនសែន និងសប្បុរសជនទាំងអស់ដែលជានិច្ចកាល តែងតែយកចិត្ដទុកដាក់ ជួយឧបត្ថម្ភគាំទ្រទាំងស្មារតី សម្ភារៈ ថវិកា ដល់ប្រជាជនទីទ័លក្រ លំបាក និងជនរងគ្រោះ ក្នុង ខេត្តកំពង់ចាមក៏ដូចជាទូទាំងប្រទេស។ បន្ទាប់ពីទ្រង់ព្រះសណ្ដាប់រួចមក សម្ដេចម៉ែ បានមានព្រះសុវណ្ណីពាំនាំព្រះរាជបណ្ដាំសួរសុខទុក្ខពី សម្ដេចឪ សម្ដេចតា សម្ដេចតាទួត ដែលជានិច្ចកាល ព្រះអង្គតែងតែមានព្រះទ័យ គិតគូរដល់សុខទុក្ខរបស់ប្រជារាស្ត្រ និងតាមរយៈព្រះទ័យនេះព្រះអង្គបាន កសាងសមិទ្ធផលមួយ ចំនួនបម្រើបងប្អូនប្រជារាស្ត្រនៅទីជនបទ ដាច់ស្រយាល តាមរយៈក្រុម សម្ដេចឪ ដែលមានសម្ដេចចៅហ្វាវាំង គង់ សំអុល ជាប្រធាន ដូចជា ជួយកសាង ស្រះទឹក អណ្ដូងទឹក ផ្លូវលំ មណ្ឌលសុខភាព និង អាគារសិក្សា ។ ជាមួយគ្នានោះ សម្ដេចម៉ែ បានថ្លែងកោតសរសើរ លោកជំទាវបណ្ឌិតប្រធាន និងបុគ្គលិកស្ម័គ្រចិត្ត កាកបាទក្រហមកម្ពុជា ដែលតែងតែសកម្មជានិច្ច ក្នុងការចុះជួយដល់ប្រជារាស្ត្រ រងគ្រោះមានទុក្ខលំបាក ខ្វះខាតនៅគ្រប់ទីកន្លែងទាន់ពេលវេលា។

សូមអរគុណ !

ធ្វើបច្ចុប្បន្នភាព ថៃ្ងទី 16 ខែ មិថុនា ឆ្នាំ២០១០