Cambodian Red Cross - assisting the vulnerable though the provision of health services, disaster management and promotion of humanitarian values.

សាវតា

ព្រះរាជាណាចក្រកម្ពុជា ជាប្រទេសមួយបានទទួលរងគ្រោះដោយសារគ្រាប់មីន និងសំណល់ពីសង្គ្រាមគ្រប់ប្រភេទច្រើនជាងគេនៅលើពិភពលោក ក្នុងអំលុង ៣ទសវត្សរ៍ ដោយជម្លោះប្រដាប់អាវុធនាចុងសតវត្សរ៍ទី២០នេះ។ ការទម្លាក់គ្រាប់បែក ការពង្រាយគ្រាប់មីន ស្ទើរគ្រប់ទីកន្លែងក្នុងប្រទេស បានធ្វើឱ្យប្រជាជនកម្ពុជា បានបាត់បង់ជីវិត និងមានអ្នកពិការជាច្រើន ជាពិសេសប្រជាជនស៊ីវិល។
ក្នុងវិបត្តិដ៏ធ្ងន់នេះ តំបន់ដាច់ស្រយាលខ្លះនៃប្រទេសកម្ពុជា ដូចជាប្រព័ន្ធ ផ្លូវទឹក ស្ពាន ថ្នល់ និងប្រព័ន្ធស្រោចស្រពផ្សេងៗត្រូវបានបំផ្លាញស្ទើរតែទាំងស្រុង។ ប្រជាជនកម្ពុជាកំពុងត្រូវការយ៉ាងខ្លាំងនូវការគាំទ្រដល់គ្រួសាររបស់ពួកគាត់ក្នុងសហគមន៍រួមទាំងជនភៀសខ្លួនដោយសារសង្គ្រាម ជនក្រីក្រ និងគ្រោះមហន្តរាយ ដោយធម្មជាតិជាដើម។

កាកបាទក្រហមកម្ពុជា បានចូលរួមចំណែកលើសកម្មភាពមីនតាំងពីឆ្នាំ ១៩៩៥ ដោយធ្វើការប្រមូលព័ត៌មាន ផ្ទុក វិភាគ និងចែកចាយព័ត៌មាន ព្រមទាំងធ្វើការអប់រំផ្សព្វផ្សាយអំពីមីន ដែលសកម្មភាពនេះបានចាប់ផ្ដើមនៅឆ្នាំ ២០០០។

ការផ្សព្វផ្សាយត្រូវបានអនុវត្ដដោយអ្នកស្ម័គ្រចិត្ដនៅតាមសហគមន៍ ក្នុងការណែនាំប្រជាពលរដ្ឋឱ្យបានយល់ដឹងពីគ្រោះថ្នាក់ដោយសារមីន និងសំណល់ពីសង្គ្រាមនៅក្នុងសហគមន៍កំពុងប្រឈមគ្រោះថ្នាក់ដោយធ្វើការដោយផ្ទាល់ជាមួយរដ្ឋអំណាចមូលដ្ឋាន និងអង្គការដៃគូពាក់ព័ន្ធដទៃទៀត។ អ្នកស្ម័គ្រចិត្តចិត្ដកាកបាទក្រហមក៏ត្រូវរកឱ្យឃើញនូវក្រុមងាយរងគ្រោះដូចជាក្រុមផ្លាស់ប្ដូរទីលំជាដើម។ ការអប់រំនេះមិនត្រឹមតែផ្សព្វផ្សាយជាក្រុមប៉ុណ្ណោះទេថែមទាំងធ្វើការប្រឹក្សានិងពិភាក្សាគ្នាដោយផ្ទាល់ជាមួយក្រុមគោលដៅនៅតាម លំនៅដ្ឋាន ស្រែ ចំការ សំដៅរកឱ្យឃើញនូវការផ្លាស់ប្ដូរទម្លាប់។

គោលដៅគម្រោង

ទិសដៅគម្រោង៖
ការពារនិងកាត់បន្ថយគ្រោះថ្នាក់ដោយសារមីននិងសំណល់ពីសង្គ្រាមតាមរយៈការអប់រំផ្សព្វផ្សាយការសង្គ្រោះបន្ទាន់ដល់ប្រជាពលរដ្ឋរស់នៅក្នុងតំបន់ដែលងាយប្រឈមគ្រោះដោយសារមីន។

ផ្នែកទី១ (ការអប់រំ)៖
1. ធ្វើការពិគ្រោះយោបល់អប់រំផ្សព្វផ្សាយដើម្បីឱ្យមានការផ្លាស់ប្ដូរឥរិយាបថដល់ក្រុមប្រជាពលរដ្ឋដែលកំពុងប្រកបរបរក្នុងតំបន់គ្រោះថ្នាក់។
2. ធ្វើការកែសម្រួលសំភារៈផ្សព្វផ្សាយដើម្បីគាំទ្រដល់ការងារអបរំអំពីមីននិងគ្រាប់មិនទាន់ផ្ទុះគ្រប់ប្រភេទ។

ផ្នែកទី២ (ការកាត់បន្ថយគ្រោះថ្នាក់ ៖

1.   ផ្ដល់ប្រាក់កម្ចីដល់គ្រួសាររងគ្រោះ និងគ្រួសារងាយរងគ្រោះ ដើម្បីការពារមិនឱ្យមានគ្រោះថ្នាក់ ដោយសារគ្រាប់មីន និងសំណល់ពីសង្គ្រាម។
2.   បង្កើតឱ្យមានក្រុមជួយគ្នាដល់ប្រជាពលរដ្ឋក្រីក្រក្នុងតំបន់គោលដៅ ទាំង ៦សាខា ខេត្ដក្រុង។
3.   ផ្ដល់ជំនួយសង្គ្រោះបន្ទាន់ដល់ជនរងគ្រោះដោយសារមីន តាមរយៈអ្នកស្ម័គ្រចិត្តនៅតាមសហគមន៍។

ផ្នែកទី៣ (ការកសាងសមត្ថភាព)៖

1. បង្កើតឱ្យមានសិក្ខាសាលាដើម្បីកសាងសមត្ថភាពបុគ្គលិកនៅសាខាខេត្ដមានដូចជានាយកសាខា មន្ត្រីអភិវឌ្ឍន៍ និង អ្នកស្ម័គ្រចិត្ត ។
2. ធ្វើការបណ្ដុះបណ្ដាលអ្នកស្ម័គ្រចិត្តស្ដីពីប្រាក់កម្ចី ដើម្បីមានសមត្ថភាពផ្ដល់ប្រាក់កម្ចីដល់ប្រជាពលរដ្ឋ។
៣. បង្កើនកិច្ចសហប្រតិបត្តិការនិងការទំនាក់ទំនងឱ្យមានប្រសិទ្ធភាពជាមួយដៃគូពាក់ព័ន្ធតាមរយៈអ្នកស្ម័គ្រចិត្តអាជ្ញាធរមូលដ្ឋាន និងអង្គការកំចាត់មីនផ្សេងៗ។

៤. បង្កើតឱ្យមានកិច្ចប្រជុំប្រចាំត្រីមាសជាមួយនាយកសាខា មន្ត្រីអភិវឌ្ឍន៍ និងអ្នកស្ម័គ្រចិត្ត ដើម្បីរកឱ្យឃើញនូវចំនុចខ្លាំង ចំនុចខ្សោយក្នុងបន្តសកម្មភាពគម្រោងឱ្យមានប្រសិទ្ធភាព។

សេចក្ដីអំពាវនាវ

ដោយសារការអនុវត្ដប្រកបដោយប្រសិទ្ធភាពនៃកម្មវិធីសកម្មភាពមីនតាមសហគមន៍ ដែលគាំទ្រថវិកាដោយរដ្ឋាភិបាលអូស្ត្រាលី តាមរយៈកាកបាទក្រហមអូស្ត្រាលី សហការជាមួយកាកបាទក្រហមណ័រវេស នឹងត្រូវបញ្ចប់នៅដំណាច់ឆ្នាំ ២០១២។ កាកបាទក្រហមកម្ពុជាកំពុងស្វែងរកដៃគូបន្តសកម្មភាពកម្មវិធីនេះក្នុងគោលបំណងបង្កើនសមត្ថភាព និងគាំទ្រដល់ប្រជាពលរដ្ឋងាយរងគ្រោះជាច្រើនតាមរយៈផ្ដល់ការ អប់រំផ្សព្វផ្សាយ ផ្ដល់ការសង្គ្រោះបន្ទាន់លើកតម្កើងសេចក្ដីថ្លៃថ្នូរដល់ជនបាត់បង់សមត្ថភាពពលកម្ម និងផ្ដល់ប្រាក់កម្ចីបែបមនុស្សធម៌ដោយពុំយកការប្រាក់។

ព៌ត័មានបន្ថែម សូមទាក់ទង៖

phireak_mom@redcross.org.kh or phireak_mom@yahoo.com

ធ្វើបច្ចុប្បន្នភាព ថៃ្ងទី ១១ ខែ វិច្ចិកា ឆ្នាំ២០១០