វគ្គបណ្ដុះបណ្ដាយ ស្ដីពី ជំងឺ (A/H1N1) និងរៀបចំផែនការត្រៀមបង្កា និងការឆ្លើយតបការរាតត្បាត ដល់អ្នកស្ម័គ្រចិត្តកាកបាទក្រហមកម្ពុជានៅស្រុកបាធាយ ខេត្ដកំពង់ចាម
-
វគ្គបណ្ដុះបណ្ដាល ស្ដីពីជំងឺផ្ដាសាយថ្មី (A/H1N1) ជូនដល់អ្នកស្ម័គ្រចិត្ដកាកបាទក្រហមកម្ពុជាមកពីឃុំចំនួន៣ គឺ ឃុំវិហារធំ ស្រុកកំពង់សៀម និង ឃុំជាលា ឃុំបាធាយ ស្រុកបាធាយ ដែលសរុបចំនួន២៧នាក់ បានចាប់ដំណើរការ នាថ្ងៃទី១១ ខែ កុម្ភៈ ឆ្នាំ ២០១០ នៅវត្ដជាលា ឃុំបាធាយ ស្រុកបាធាយ ខេត្ដកំពង់ចាមក្រោមការចូលរួមជាអធិបតីពីសំណាក់ លោក កែវ ចន្ទណារ៉េត នាយកសាខាកាកបាទក្រហមកម្ពុជា ខេត្ដកំពង់ចាម។
មានប្រសាសន៍ក្នុងពិធីបើកវគ្គបណ្ដុះបណ្ដាលនេះ លោកនាយក កែវ ចន្ទណារ៉េត បានសំណូមពរ អ្នកស្ម័គ្រចិត្ដ កាកបាទក្រហមកម្ពុជាតាមឃុំទាំងអស់ ពេលត្រឡប់ទៅមូលដ្ឋានវិញ ត្រូវយកចំណេះដឹងទាំងអស់នេះធ្វើការផ្សព្វផ្សាយដល់ប្រជាជនក្នុងមូលដ្ឋានរបស់ខ្លួនឱ្យបានជ្រួបជ្រាប និងចូលរួមទប់ស្កាត់ជំងឺផ្ដាសាយថ្មីឱ្យបានទាន់ពេលវេលា ព្រោះជំងឺផ្ដាសាយថ្មីនេះបានបង្កនូវការគំរាមកំហែងដល់ជីវិត មនុស្ស សត្វ ទ្រព្យសម្បតិ្ត និងជីវភាពរស់នៅរបស់ប្រជាពលរដ្ឋ ដូច្នេះយើងទាំងអស់គ្នាត្រូវដឹងឱ្យច្បាស់ពីក្រុមមនុស្សងាយរងគ្រោះជាងគេបំផុត នៅក្នុងសហគមន៍របស់ខ្លួន។
លោកនាយកក៏បានមានប្រសាសន៍បន្ដទៀតថា ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតរបស់លោកជំទាវ ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា តែងតែគិតគូរដល់ប្រជាជនងាយរងគ្រោះទាំងជីវភាពរស់នៅ ទាំងសុខភាពដែលជាកត្ដាធ្វើឱ្យម្ចាស់អំណោយមានទំនុកទុកចិត្ដដល់កាកបាទក្រហមកម្ពុជា ហើយម្ចាស់អំណោយបានឃើញសកម្មភាពមនុស្សធម៌ពិតៗ និងប្រកបដោយតម្លាភាព។ លោកបានជំរុញឱ្យអ្នកស្ម័គ្រចិត្ដ ចូលរួមចំណែកផ្សព្វផ្សាយពីជំងឺផ្ដាសាយបក្សីប្រភេទថ្មីដល់ប្រជាជនក្នុងមូលដ្ឋាន ដែលទង្វើនេះពិតជាបង្ហាញឱ្យឃើញនូវការចូលរួមចំណែកកាត់បន្ថយភាពក្រីក្ររបស់ប្រជាជនយើង និងក៏ស្របតាមយុទ្ធសាស្ដ្ររបស់កាកបាទក្រហមកម្ពុជាយើងដែរ។
សូមអរគុណ !
