Cambodian Red Cross - assisting the vulnerable though the provision of health services, disaster management and promotion of humanitarian values.

មហាសន្និបាតវិសាមញ្ញកាកបាទក្រហមកម្ពុជា

នៅព្រឹកថ្ងៃទី ០៥ ខែ សីហា ឆ្នាំ ២០១០ អង្គមហាសន្និបាតកាកបាទក្រហមកម្ពុជា អាណត្ដិទី ៥ បានចាប់ផ្ដើមបន្ដដំណើរការរបស់ខ្លួននៅវេលាម៉ោង ០៧និង៣០នាទី ព្រឹក ទៅតាមកម្មវិធី និងរបៀបវារៈដែលបាន គ្រោងទុក។ អង្គមហាសន្និបាតបានធ្វើការពិភាក្សាយ៉ាងផុសផុលទៅលើរបាយការណ៍ទាំង ៣ ដែលបានដាក់ ជូនអង្គមហាសន្និបាត កាលពីរសៀលថ្ងៃទី ០៤ ខែ សីហា ឆ្នាំ ២០១០ ដោយផ្ដល់នូវការគាំទ្រ ឯកភាព និងអនុម័តលើខ្លឹមសារនៃរបាយការណ៍ទាំង ៣ ហើយនិងមានមោទនភាពយ៉ាងខ្លាំង ចំពោះសមិទ្ធផលនានា ដែលកាកបាទក្រហមកម្ពុជា សម្រេចបានទាំងនៅថ្នាក់កណ្ដាល និងថ្នាក់សាខាខេត្ដ-រាជធានី ជាមួយនឹងការ ប្ដេជ្ញាចិត្ដ ខិតខំប្រឹងប្រែង ពុះពារសម្រេចឱ្យបានជោគជ័យនៅអាណត្ដិថ្មីនេះ ។

អង្គមហាសន្និបាត បានទទួលស្គាល់អំពីសមិទ្ធផលធំៗ ដែលកាកបាទក្រហមកម្ពុជា ទាំងថ្នាក់កណ្ដាល និងសាខាសម្រេចបាន គឺកើតចេញពីការខិតខំប្រឹងប្រែងរួមប្រកបដោយស្មារតីទទួលខុសត្រវខ្ពស់របស់ គណៈអភិបាល ក្រុមប្រតិបត្ដិ សមាជិក-សមាជិកា អ្នកស្ម័គ្រចិត្ដ យុវជនកាកបាទក្រហមនៅគ្រប់លំដាប់ថ្នាក់ នៅទូទាំងប្រទេស និងដោយមានព្រះរាជឧបត្ថម្ភគាំទ្រពី ព្រះមហាក្សត្រ ព្រះវររាជបីតា និង ព្រះមហាក្សត្រី ព្រះវររាជមាតា ព្រះប្រធានកិត្ដិយសកាកបាទក្រហមកម្ពុជា ជាពិសេសមានការគាំទ្រ លើកទឹកចិត្ដទាំងផ្នែកស្មារតី និងសម្ភារៈពីរាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ព្រមទាំងដៃគូសហប្រតិបត្ដិការទាំងក្នុង និងក្រៅប្រទេស។

អង្គមហាសន្និបាត បានពិភាក្សាយ៉ាងផុលផុសទៅលើសកម្មភាពកាកបាទក្រហមកម្ពុជាដែលបាន អនុវត្ដក្នុងអាណត្ដិទី ៤ កន្លងមក ដោយផ្ដោតការយកចិត្ដទុកដាក់ធ្វើការវិភាគទៅលើចំណុចខ្លាំង បទពិសោធន៍ និងចំណុចនៅខ្វះខាត ដើម្បីដាក់ចេញនូវទិសដៅ ៤ ឆ្នាំបន្ដ (២០១០-២០១៤) និងយុទ្ធសាស្ដ្រកាកបាទក្រហមកម្ពុជា ២០១១-២០២០។

អង្គមហាសន្និបាតក៏បានឯកភាព និងអនុម័តលើរបាយការណ៍ហិរញ្ញវត្ថុ និងផែនការហិរញ្ញវត្ថុ ៤ ឆ្នាំ បន្ដ ២០១០-២០១៤ ដែលនៅក្នុងនោះរបាយការណ៍បានបង្ហាញយ៉ាងច្បាស់ពីតម្លាភាព និងគណនេយ្យភាព នៃការងារគ្រប់គ្រង ប្រើប្រាស់មូលនិធិដែលសមាគមជាតិទទួលបានពីគ្រប់ប្រភព សម្រាប់សកម្មភាពការងារ ចម្រុះវិស័យ ដែលនេះជាយន្ដការធានាបាននូវការជឿទុកចិត្ដដ៏កក់ក្ដៅពីសំណាក់ម្ចាស់ជំនួយ និងសប្បុរសជនក្នុង និងក្រៅប្រទេស។

ទន្ទឹមនឹងនេះអង្គមហាសន្និបាត បានផ្ដល់នូវអនុសាសន៍ និងសំណូមពរដល់កាកបាទក្រហមកម្ពុជា ត្រូវយកចិត្ដទុកដាក់ និងពុះពារលើការងារមួយចំនួនដូចជា ៖
១/ ពង្រឹង និងកំណត់ឱ្យបានច្បាស់នូវតួនាទី ភារកិច្ចរបស់គណៈកិត្ដិយស គណៈកម្មាធិការសាខា និងក្រុមប្រតិបត្ដិឱ្យមានលក្ខណៈបំពេញគ្នាទៅវិញទៅមក ធានាសាមគ្គីភាព ឯកភាព កិច្ចសហប្រតិបត្ដិការ ដើម្បីបង្កើនសមត្ថភាព និងប្រសិទ្ឋភាពការងាររបស់ សាខា នីមួយៗ ក្នុងការជួយផ្ដល់សេវាមនុស្សដល់អ្នកងាយរងគ្រោះក្នុងក្របខណ្ឌដែនដីរបស់ខ្លួន
២/ បន្ដអនុវត្ដគោលការណ៍ស្ដីពីការអភិវឌ្ឍសាខាតាមបែបវិមជ្ឈការ និងវិសហមជ្ឈការត្រូវធ្វើជាជំហានៗទៅ តាមសមត្ថភាព និងលទ្ធភាព ពិសេសការអភិវឌ្ឍធនធានមនុស្ស និងថវិការបស់សាខាខ្លួន។

បន្ទាប់ពី លោកជំទាវ អាន្នី សុខអាន អនុប្រធានកាកបាទក្រហមកម្ពុជា បានអានសេចក្ដី ប្រកាសរំសាយគណៈកម្មាធិការកណ្ដាលកាកបាទក្រហមកម្ពុជា អាណត្ដិទី ៤ គណៈកម្មការរៀបចំបោះឆ្នោត ជ្រើសរើសគណៈកម្មាធិការកណ្ដាល អាណត្ដិទី ៥ បានចាប់ផ្ដើមដំណើរការបោះឆ្នោត ក្រោមការសង្កេតពី ភ្ញៀវកិត្ដិយសជាតិ-អន្ដរជាតិ។

ជាលទ្ធផលអង្គមហាសន្និបាត បានជ្រើសរើសគណៈកម្មាធិការកណ្ដាលកាកបាទក្រហមកម្ពុជា អាណត្ដិ ទី ៥ មានចំនួន ២៤ រូប និងសមាជិកបំរុងចំនួន ០៣ រូប ។ គណៈកម្មាធិការកណ្ដាលកាកបាទក្រហមកម្ពុជា មាន តួនាទីអភិបាល ដឹកនាំ គ្រប់គ្រង និងផ្ដល់ការឧបត្ថម្ភ គាំទ្រ លើកទឹកចិត្ដដល់ក្រុមប្រតិបត្ដិ និងកាកបាទក្រហម កម្ពុជាគ្រប់លំដាប់ថ្នាក់ ស្របតាមទិសដៅ និងយុទ្ធសាស្ដ្រដែលដាក់ចេញដោយមហាសន្និបាត ដើម្បីធ្វើឱ្យកាកបាទក្រហមកម្ពុជាក្លាយជាស្ថាប័នមនុស្សធម៌ឈានមុខក្នុងប្រទេស ក្នុងការឆ្លើយតបទៅនឹងសេចក្ដីត្រូវការរបស់ជន ងាយរងគ្រោះឱ្យបានទាន់ពេលវេលា និងមានប្រសិទ្ធភាព។

អង្គមហាសន្និបាតបានបញ្ចប់នូវកម្មវិធីជាបណ្ដោះអាសន្ននៅវេលាម៉ោង ១២និង០០នាទី នាថ្ងៃដដែល៕

សូមអរគុណ !

ធ្វើបច្ចុប្បន្នភាព ថៃ្ងទី ០៥ ខែ សីហា ឆ្នាំ២០១០