Cambodian Red Cross - assisting the vulnerable though the provision of health services, disaster management and promotion of humanitarian values.

មហាសន្និបាតវិសាមញ្ញកាកបាទក្រហមកម្ពុជា

នៅព្រឹកថ្ងៃទី ០៤ ខែ សីហា ឆ្នាំ ២០១០ នៅទីស្នាក់ការកណ្ដាលកាកបាទក្រហមកម្ពុជាបានប្រារព្ធបើកមហាសន្និបាតវិសាមញ្ញ និងដឹកនាំអង្គមហាសន្និបាតដោយលោកជំទាវបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដោយយោងតាមលក្ខន្ដិកៈ និងវិធាននៃនីតិក្រម ត្រង់វិធានទី ៨ ចែងថា “ប្រធានកាកបាទក្រហមកម្ពុជា គឺជាប្រធាននៃអង្គមហាសន្និបាត” និងមានការចូលរួមពីសមាជិកពេញសិទ្ធចំនួន ១៨៩ នាក់ ដែលជាដំណាងមកពីសាខា ២៤ ខេត្ដ-រាជធានី និងដំណាងសមាជិកភាព មកពីក្រសួង ស្ថាប័ន អង្គភាព និងអ្នកសង្កេតការណ៍ចំនួន ៩២ នាក់ រួមមានដំណាងសហព័ន្ធអន្ដរជាតិ គណៈកម្មាធិការ អន្ដរជាតិកាកបាទក្រហម មន្ដ្រី-បុគ្គលិកទីស្នាក់ការកណ្ដាល នាយក-នាយិកាសាខាខេត្ដ-រាជធានី ដំណាងយុវជន និងអ្នកស្ម័គ្រចិត្ដកាកបាទក្រហមកម្ពុជាទាំង ២៤ ខេត្ដ-រាជធានី។ មហាសន្និបាតវិសាមញ្ញមានរបៀបវារៈ ២ ជាសំខាន់៖ ទី ១ គឺការពិភាក្សា និងអនុម័តលើ សេចក្ដីព្រាងវិសោធនកម្មលក្ខន្ដិកៈ និងវិធាននៃនីតិក្រម និងទី ២ គឺការពិភាក្សា និងអនុម័ត ទៅលើបញ្ជី សមាសភាព និងចំនួនបេក្ខជនឈរឈ្មោះសមាជិកគណៈកម្មាធិការកណ្ដាល អាណត្ដិទី ៥ និងសមាជិកបំរុង។ សម្រាប់របៀបវារៈទី ១ អង្គមហាសន្និបាតវិសាមញ្ញបានពិភាក្សា និងអនុម័តទៅលើវិសោធនកម្មលក្ខន្ដិកៈ និងវិធាននៃនីតិក្រមដែលមាន ១២ មាត្រា និង ១០ វិធាន ពាក់ព័ន្ធលើការកែសម្រួលរចនាសម្ព័ន្ធ កាកបាទក្រហមកម្ពុជា ដោយបន្ថែមគណៈកិត្ដិយសនៅថ្នាក់សាខា និងអនុសាខា សន្និបាតយុវជនកាកបាទក្រហមកម្ពុជា ការបោះឆ្នោត និងការប្ដូរវេនសមាជិកគណៈកម្មាធិការកណ្ដាលសម្រាប់អាណត្ដិនីមួយៗ និង ការផ្លាស់ប្ដូរប្រធាន ឬអនុប្រធានគណៈកម្មាធិការសាខាមុនអាណត្ដិ។ ដោយឡែកចំពោះរបៀបវារៈទី ២ អង្គមហាសន្និបាតវិសាមញ្ញបានពិភាក្សា និងអនុម័តលើបញ្ជីឈ្មោះ និងចំនួនបេក្ខជនឈរឈ្មោះគណៈកម្មា-ធិការកណ្ដាលទាំង ២៣ រូប និងសមាជិកបំរុងចំនួន ៣ រូប ដែលបានឆ្លុះបព្ចាំងពីប្រវត្ដិខុសៗគ្នា ជំនឿ សាសនា ទស្សនៈ នយោបាយ សង្គម វិជ្ជាជីវៈ ជាពិសេសមានយេនឌ័រ និងយុវជនវ័យក្មេងចូលរួមទៀតផង ។ មហាសន្និបាតវិសាមញ្ញ បានបញ្ចប់នៅវេលាម៉ោង ១១ៈ៣០ នាទី ព្រឹក ដោយបានឯកភាពជាឯកឆន្ទ ទៅលើរបៀបវារៈទាំង ២ ដើម្បីត្រៀមលក្ខណៈសម្បត្ដិឱ្យបានគ្រប់គ្រាន់សម្រាប់ដំណើរការមហាសន្និបាតពេញអង្គដែលនឹងប្រារព្ធធ្វើនៅរសៀលថ្ងៃទី ០៤ និងថ្ងៃទី ០៥ ខែ សីហា ឆ្នាំ ២០១០ ខាងមុខនេះ នាសាលសន្និសីទចតុមុខ៕

សូមអរគុណ !

ធ្វើបច្ចុប្បន្នភាព ថៃ្ងទី ០៤ ខែ សីហា ឆ្នាំ២០១០