អគ្គលេខាធិការកាកបាទក្រហមកម្ពុជាទទួលអំណោយពីសប្បុរសជន
លោកជំទាវអគ្គលេខាធិការកាកបាទក្រហមកម្ពុជា ពុំ ចន្ទីនី បានជួបសំណេះសំណាលនិងទទួលអំណោយជាអង្ករចំនួន៥០តោនពី លោក កេង សុម៉ារិទ្ធ និងលោកស្រី លី សុខឆេង ដែលត្រូវជាបុត្ររបស់ ឯកឧត្តម ជីវ កេង និងបុត្រីរបស់ លោកជំទាវឧកញ៉ា ភាព ហៀក និងលោកច័ន្ទ វិចិត្រ និងលោកស្រី ណែម ជានិត្យអំណោយជាថវិកាចំនួន ៥លានរៀល ដែលជាបុត្រីរបស់ឯកឧត្តម កង ណែមនៅទីស្នាក់ការកណ្តាលកាកបាទក្រហមកម្ពុជានាថ្ងែទី ១៨ មករា ២០១២។
មានប្រសាសន៍ក្នុងឱកាសនោះ លោកជំទាវ ពុំ ចន្ទីនីបានថ្លែងអំណរគុណដល់គូស្វាមី ភរិយាថ្មីដែលបានចូលរួមចំណែកក្នុងវិស័យមនុស្សធម៌ដើម្បីឱ្យកាកបាទក្រហមកម្ពុជាមានលទ្ធភាពជួយដល់ជនងាយរងគ្រោះបានទាន់ពេលវេលា។ លោកជំទាវបានជម្រាបជូនគូស្វាមី ភរិយាថ្មីទាំងពីរផងដែរពីសកម្មភាពរបស់កាកបាទក្រហមកម្ពុជាដែលបានអនុវត្តកន្លងមក ជាពិសេសសកម្មភាពជួយដល់ជនរងគ្រោះដោយគ្រោះមហន្តរាយទឹកជំនន់កន្លងទៅថ្មីៗនេះ។ លោកជំទាវបានពាំនាំនូវការថ្លែងអំណរគុណដល់គូស្វាមី ភរិយាថ្មី ពីសំណាក់ លោកជំទាវ កិត្តិព្រឹទ្ធបណ្ឌិតប៊ុន រ៉ានី ហ៊ុនសែន ដែលបានលះបង់ថវិកាផ្ទាល់ខ្លួនជួយដល់ប្រជាជនងាយរងគ្រោះដែលត្រូវការចាំបាច់នូវជំនួយទាំងនោះ។
គូស្វាមី ភរិយាថ្មីបានជម្រាបជូនកាកបាទក្រហមកម្ពុជាថា លោកសូមកោតសរសើរចំពោះការលះបង់ខ្ពស់ទាំងកម្លាំងកាយចិត្ត រួមទាំងទ្រព្យធនផ្ទាល់ខ្លួនរបស់ លោកជំទាវ កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងវិស័យមនុស្សធម៌ដល់កាកបាទក្រហមកម្ពុជា សំដៅជួយដល់ប្រជាជនងាយរងគ្រោះឱ្យទាន់ពេលវេលា ចំទិសដៅ និងមានតម្លាភាព បានញាំងឱ្យគូស្វាមី ភរិយាថ្មីមានបំណងចូលរួមជាមួយកាកបាទក្រហមកម្ពុជាជួយដល់ប្រជាជនងាយរងគ្រោះដែលបាននឹងកំពុងត្រូវការចាំបាច់នូវជំនួយសង្គ្រោះបន្ទាន់ និងក៏ជាការចូលរួមចំណែកកាត់បន្ថយភាពក្រីក្ររបស់រដ្ឋាភិបាលផងដែរ។
អត្ថបទដោយ៖ លោក ហូត ចេងឆាយ
ធ្វើបច្ចុប្បន្នភាព ថៃ្ងទី ២០ ខែ មករា ឆ្នាំ២០១២
