លោកជំទាវ អាន្មី សុខ អាន ទទួលជួបសវនាការ និងទទួលអំណោយ ពីក្រុមហ៊ុន ភូម៉ាឌី
កាលពីរសៀលថ្ងៃទី ០៩ ខែ មករា ឆ្នាំ ២០១២ វេលាម៉ោង ១៦:០០ លោកជំទាវ អាន្មី សុខ អាន អនុប្រធានទី ១ កាកបាទក្រហមកម្ពុជា បានទទួលជួបសវនាការ និងទទួលអំណោយពីក្រុមហ៊ុន ភូម៉ាឌី នៅទីស្នាក់ការកណ្តាលកាកបាទក្រហមកម្ពុជា។
ជាកិច្ចចាប់ផ្តើម លោក Tran Hoan នាយកក្រុមហ៊ុន ភូម៉ាឌី បានសម្តែងនូវការសប្បាយរីករាយ និងថ្លែងអំណរគុណដែលបានចូលរួមចំណែកជាមួយកាកបាទក្រហមកម្ពុជា នៅក្នុងវិស័យ មនុស្សធម៌។ លោកក៏បានថ្លែងនូវអំណរគុណចំពោះ លោកជំទាវអនុប្រធានទី១ ដែលបាន អនុញ្ញាត និងចំណាយពេលវេលាដ៏មានតម្លៃ ដើម្បីធ្វើការជួបសំណេះសំណាល ជាមួយលោក និងក្នុងនាមក្រុមហ៊ុនទាំងមូល។
លោកជំទាវអនុប្រធានទី១ ក៏បានថ្លែងនូវអំណរគុណចំពោះ លោក នាយកក្រុមហ៊ុន ដែលមានសន្តានចិត្តមនុស្សធម៌ ក្នុងការជួយដល់ជនដែលងាយរងគ្រោះជាមួយកាកបាទក្រហមកម្ពុជា។ លោកជំទាវអនុប្រធានទី១ ក៏បានជំរាបថា កាកបាទក្រហមកម្ពុជា ដែលមាន លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានទទួលនូវសមិទ្ធផល និងទំនុកចិត្ត ជាច្រើនពីសំណាក់សប្បុរសជនជាតិ និងអន្តរជាតិ។ ជាពិសេស ក្នុងនាមជាជំនួយការរបស់ រាជរដ្ឋាភិបាល កាកបាទក្រហមកម្ពុជា បានធ្វើការឆ្លើយតបទៅនឹងគ្រោះមហន្តរាយនានា ជាពិសេសគ្រោះទឹកជំនន់កាលពីឆ្នាំមុន បានយ៉ាងទាន់ពេលវេលា និងប្រកបដោយប្រសិទ្ធភាព យ៉ាងក្រៃលែង នៅតាមបណ្ដាសាខាកាកបាទក្រហមកម្ពុជាទាំង ២៤ ខេត្តក្រុង ទូទាំងប្រទេស។
លោកជំទាវអនុប្រធានទី១ ក៏បានលើកឡើងផងដែរថា ក្រុមហ៊ុន ភូម៉ាឌី បាននឹងជួយដល់ប្រជាជន និងរាជរដ្ឋាភិបាល នៅក្នុងការជួយកាត់បន្ថយភាពក្រីក្រ តាមរយះការជួយផ្តល់នូវការងារដល់ប្រជាជនកម្ពុជាជាច្រើននៅក្នុងក្រុមហ៊ុន។ លោកជំទាវអនុប្រធានទី១ ក៏បានអំពាវនាវដល់ ក្រុមហ៊ុនសូមជួយបន្តឧបត្ថម្ភ និងសូមអំពាវនាវបន្តដល់ក្រុមហ៊ុនផ្សេងៗទៀត ដើម្បីជួយដល់ កាកបាទក្រហមកម្ពុជា ក្នុងការអនុវត្តការដ៏ឧត្តុង្គឧត្តមរបស់ខ្លួនប្រកបដោយប្រសិទ្ធភាពបន្ថែមទៀត។
ជាទីបញ្ចប់ លោកជំទាវអនុប្រធានទី១ បានជូនពរដល់ លោកប្រធានក្រុមហ៊ុន និងសហការី សូមឱ្យមានសុខភាពមាំមួន និងជោគជ័យបន្ថែមទៀតនៅក្នុងការប្រកបរបររបស់ខ្លួន៕
អត្ថបទដោយ៖ លោក តាំង សាមឿន
ធ្វើបច្ចុប្បន្នភាព ថៃ្ងទី ១០ ខែ មករា ឆ្នាំ២០១២
