សម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា យាងអញ្ជើញចុះចែកអំណោយដល់ប្រជាជនរងគ្រោះដោយទឹកជំនន់
កាលពីព្រឹកថ្ងៃទី ២៩ ខែ ធ្នូ ឆ្នាំ ២០១១ សម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា អមដំណើរដោយ លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ព្រមទាំងមន្ត្រី បុគ្គលិកកាកបាទក្រហមកម្ពុជា បានយាង និងអញ្ជើញចុះសួរសុខទុក្ខ និងចែកអំណោយជាស្បៀង សំភារៈរបស់កាកបាទក្រហមកម្ពុជា ដល់ប្រជាជនទីទ័លក្រ ដែលរងគ្រោះដោយទឹកជំនន់នៅ ភូមិព្រែករាំង ឃុំទឹកវិល ស្រុក ស្អាង ខេត្តកណ្តាល ចំនួន ៦២០ គ្រួសារ។
សម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា បានជម្រាបការនឹករលឹក និងសោកស្ដាយយ៉ាងក្រៃលែងពីសំណាក់ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និង ព្រះករុណាព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាជាតិខ្មែរ ដល់ប្រជាជនដែលបានទទួលរងគ្រោះដោយសារទឹកជំនន់ ទូទាំងព្រះរាជាណាចក្រកម្ពុជា ។ សម្តេចព្រះមហាក្សត្រី នរោត្តម មុនីនាថ សីហនុ ក៏បានធ្វើការកោតសរសើរដល់ការដឹកនាំរបស់រាជរដ្ឋាភិបាលកម្ពុជា និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានឆ្លើយតប និងជួយដល់ប្រជាជន រងគ្រោះបានយ៉ាងទាន់ពេលវេលា ព្រមទាំងប្រកបដោយប្រសិទ្ធភាព។
អំណោយដែលត្រូវចែកជូនរួមមាន ៖ ស្រូវពូជ ២០ គក្រ អង្ករ ៣០ គក្រ មី ១ កេស ត្រីខ ១០ កំប៉ុង សារុង ១ ក្រមា ១ មុង ១ កំរាលស ១ ខោអាវ ១ កំប្លេ នំបុ័ងបាក់យ៉ុង ២ ដើម ទឹកបរិសុទ្ធឪរ៉ាល់ ២ ដប និងថវិកា ៥០០០០ រៀល៕
អត្ថបទដោយ៖ លោក តាំង សាមឿន
ធ្វើបច្ចុប្បន្នភាព ថៃ្ងទី ០៤ ខែ មករា ឆ្នាំ២០១២
