លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជួបសវនាការ និងទទួលអំណោយសប្បុរសជន
កាលពីថ្ងៃទី ៧ ខែ ធ្នូ ឆ្នាំ ២០១២ លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានអញ្ជើញជួបសវនការ ជាមួយប្រតិភូចំនួន ៣ ក្រុម និងទទួលអំណោយជាថវិកាជារួមចំនួន 340,000 ដុល្លារ អាមេរិក និងអង្ករ ៥០ តោន។ ប្រតិភូចំនួន ៣ ក្រុម ដែលអញ្ជើញចូលជួបសំដែងការគួរសម និងឧបត្ថម្ភថវិកា និងអង្ករ ជូនដល់កាកបាទក្រហមកម្ពុជាមាន៖
ប្រតិភូទី១ គឺក្រុមហ៊ុន អ៊ីអន ដឹកនាំដោយលោក ណាហ្កាហ៊ីសា អូយ៉ាម៉ា អគ្គនាយករង និងជានាយកប្រតិបត្តិ ក្រុមហ៊ុន អ៊ីអន ប្រចាំនៅអាស៊ាន និងប្រតិភូអមដំណើរ ៤ រូប ឧបត្ថម្ភថវិកាចំនួន 222,084.03 ដុល្លារអាមេរិក ដែលក្នុង ទឹកប្រាក់នេះទទួលបានពីសប្បុរសជនជប៉ុន និងក្រុមហ៊ុន AEON 1% CLUB ។ ក្រុមហ៊ុនបានបង្កើតឡើងនៅឆ្នាំ ១៩២៥ ផ្ដោតលើវិស័យកសិកម្ម និងសាងសង់ទីផ្សារទំនើប ដែលមានផ្សារទំនើបប្រមាណ ៥០០ នៅតាមបណ្ដាប្រទេសជុំវិញ ពិភពលោក និង ១,៥០០ នៅក្នុងប្រទេសជប៉ុន។ ក្រុមហ៊ុនមានការិយាល័យបណ្ដោះអាសន្ននៅកម្ពុជា ដែលមានទីតាំងជាប់ សណ្ឋាគារកាំបូឌីយ៉ាណា នឹងចាប់ផ្តើមសាងសង់ផ្សារទំនើបមួយធំនៅប្រទេសកម្ពុជា ចាប់ផ្តើមឆ្នាំ២០១២ បញ្ចប់ឆ្នាំ២០១។
ប្រតិភូទី២ ក៏បានអញ្ជើញជួបសវនការបន្តមាន អាជ្ញាធរប្រេងកាតជាតិកម្ពុជា សហការជាមួយដៃគូ ក្រុមហ៊ុន សេហ្វ្រន ប្រចាំកម្ពុជា ក្រុមហ៊ុន ម៉ូអ៊ីតូ និង ក្រុមហ៊ុន គ្រឹសអេនើជឺ ដឹកនាំដោយ ឯកឧត្តម ហូ វិចិត្រ អនុប្រធានអាជ្ញាធរ ប្រេងកាតជាតិកម្ពុជា អមដំណើរប្រតិភូ ១១ រូប ដោយនាំយកថវិកាចំនួន 50,000 ដុល្លារអាមេរិក ឧបត្ថម្ភជូន កាកបាទក្រហមកម្ពុជា ក្នុងគោលបំណងជួយដល់ប្រជាជនងាយរងគ្រោះដោយគ្រោះមហន្តរាយទឹកជំនន់ នាពេលកន្លងទៅ។ ជាមួយគ្នានោះ ប្រធានក្រុមហ៊ុន សេហ្វ្រន ក៏បានជម្រាបជូនពីកិច្ចសហការដ៏ល្អរបស់ក្រុមហ៊ុន ជាមួយអាជ្ញាធរប្រេងកាតជាតិកម្ពុជា ក្នុងការរុករកប្រេងកាតនៅកម្ពុជា កន្លងមកដែលបានចំណាយអស់ថវិកាប្រមាណ 178 លានដុល្លារអាមេរិក ចាប់តាំងពីឆ្នាំ២០០២ មកម្ល៉េះ។ មកដល់ពេលនេះក្រុមហ៊ុន សេហ្វ្រន និងដៃគូបានរកឃើញ និងខួងអណ្តូងបានចំនួន ១៨ កន្លែងហើយ ដែលនឹងសន្មតថាអាចធ្វើអាជីវកម្មបាន។ ក្រុមហ៊ុនទើបទទួលបានអាជ្ញាប័ណ្ណផលិតកម្មកាលពីចុងឆ្នាំ ២០១១។ ការសម្ភោធបើកការដ្ឋានធ្វើ អាជីវកម្មប្រេងកាត គ្រោងធ្វើថ្ងៃទី ១២ ធ្នូ ២០១២ ខាងមុខនេះ។
ប្រតិភូទី៣ ក៏នឹងចូលជួបសវនការបន្តគឺ រតនាគារជាតិ ដឹកនាំដោយ ឯកឧត្តម ងិន ឃន ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃនាយកដ្ឋានរតនាគារជាតិ រួមទាំងមន្ត្រីចំនួន ៣៥រូប ដែលជាប្រធានរតនាគារជាតិ អញ្ជើញមកពី ២៤រាជធានី-ខេត្ត បានឧបត្ថម្ភថវិកាចំនួន 20,000 ដុល្លារអាមេរិក និងអង្ករ 50 តោន ជូនកាកបាទក្រហមកម្ពុជា។
ប្រតិភូទាំង ៣ក្រុម បានសំដែងនូវអំណរគុណយ៉ាងជ្រាលជ្រៅចំពោះ លោកជំទាវកិត្តិព្រឹទ្ធបណ្ឌិតប្រធាន ដែល បានផ្តល់ពេលវេលាដ៏មានតម្លៃជូនប្រតិភូទាំង៣ក្រុម បានចូលជួបសំដែងការគួរសម និងឧបត្ថម្ភជាថវិកា និងអង្ករជូនដល់ កាកបាទក្រហមកម្ពុជា ដើម្បីជួយដល់សកម្មភាពមនុស្សធម៌។ ឯកឧត្តម ងិន ឃន ក៏បានគូសបញ្ជាក់ផងដែរថា ក្រោមការ ដឹកនាំប្រកបដោយទសពិតរាជធម៌ តម្លាភាព ព្រមទាំងកាយវិការប្រកបដោយសប្បុរសធម៌ ជាមួយនឹងទឹកចិត្តស្នេហាជាតិពិត របស់ សម្តេចអគ្គមហាសេនាបតីតេជោ ហ៊ុន សែន និង លោកជំទាវកិត្តិព្រឹទ្ធបណ្ឌិតប្រធាន កាកបាទក្រហមកម្ពុជា ធ្វើឱ្យកាកបាទក្រហមកម្ពុជា ទទួលបាននូវការគាំទ្រទាំងសប្បុរសជនក្នុង និងក្រៅប្រទេស។ ជាមួយគ្នានោះ ប្រតិភូទាំង៣ក្រុម បានសន្យានឹងជួយស្វែងរកសប្បុរសជន ដើម្បីជួយដល់កាកបាទក្រហមកម្ពុជាជារៀងរហូត។
ជាកិច្ចឆ្លើយតបប្រតិភូទាំង៣ក្រុម លោកជំទាវកិត្តិព្រឹទ្ធបណ្ឌិតប្រធាន បានមានប្រសាសន៍ថ្លែងអំណរគុណយ៉ាង ជ្រាលជ្រៅ ចំពោះទឹកចិត្តសប្បុរសជនក្នុង និងក្រៅប្រទេស ដែលជានិច្ចកាលតែងតែនឹកឃើញ និងជួយដល់កាកបាទក្រហមកម្ពុជា។ លោកជំទាវកិត្តិព្រឹទ្ធបណ្ឌិតប្រធាន ក៏បានជម្រាបពីគ្រោះមហន្តរាយទឹកជំនន់ ដែលបណ្តាលមកពីការហូរចូលពីទន្លេមេគង្គ ទន្លេសាប នឹងទឹកភ្លៀង ធ្វើឱ្យប្រទេសកម្ពុជាទទួលនូវគ្រោះមហន្តរាយយ៉ាងធំពុំដែលធ្លាប់ជួបប្រទះ។
តែទន្ទឹមនឹងនោះអំណោយមនុស្សធម៌របស់សប្បុរសជនជាបន្តបន្ទាប់ និងដោយមានការឧបត្ថម្ភពីរាជរដ្ឋាភិបាលជាអង្ករចំនួន ៦ ពាន់តោន កាកបាទក្រហមកម្ពុជាបានជួយសង្គ្រោះប្រជាពលរដ្ឋបានជាង ២៧ម៉ឺនគ្រួសារ នៃគ្រួសាររងគ្រោះទាំងអស់ជាង ៣៥ម៉ឺនគ្រួសារ នៅទូទាំង ១៧ ក្រុង-ខេត្ត។ លោកជំទាវកិត្តិព្រឹទ្ធបណ្ឌិតប្រធាន ក៏បានជម្រាបបន្ថែមថា កាកបាទក្រហមកម្ពុជា បាននឹងកំពុងធ្វើការបែងចែកជូនគ្រួសារងាយរងគ្រោះឱ្យបានទាន់ពេលវេលា និងមានប្រសិទ្ធភាពបំផុត ដើម្បីឆ្លើយតបទៅនឹងបំណងប្រាថ្នារបស់ម្ចាស់អំណោយ។
ជាទីបញ្ចប់ លោកជំទាវកិត្តិព្រឹទ្ធបណ្ឌិតប្រធាន សូមជូនពរប្រតិភូទាំង៣ក្រុម មានក្រុមហ៊ុន អ៊ីអន សូមទទួលបានជោគជ័យក្នុងការប្រកបអាជីវកម្ម ក៏ដូចជាការកសាងទីផ្សារទំនើបនៅកម្ពុជា ឱ្យមានដំណើរការល្អឈានឡើងជោគជ័យជានិច្ច និងសូមឱ្យកិច្ចសហការរវាងអាជ្ញាធរប្រេងកាតជាតិកម្ពុជា និង ក្រុមហ៊ុន សេហ្វ្រន ទទួលបានជោគជ័យក្នុងការបណ្ដាក់ទុននៅកម្ពុជា និងទទួលបានប្រាក់ចំណូលលើសការចំណាយកន្លងមក នឹងក្នុងនោះមានរតនាគារជាតិផងដែរ ជួបតែសំណាងល្អសុខភាពល្អ និងជោគជ័យក្នុងការបំពេញភារកិច្ច។
អត្ថបទដោយ ៖ លោកស្រី ជា សុម៉ាលី
ធ្វើបច្ចុប្បន្នភាព ថៃ្ងទី ២២ ខែ ធ្នូ ឆ្នាំ២០១១
