លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជួបសវនាការ និងទទួលអំណោយសប្បុរសជន
កាលពីព្រឹក ថ្ងៃទី ០៦ ខែ ឆ្នូ ឆ្នាំ ២០១១ លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធាន កាកបាទក្រហមកម្ពុជា បានទទួលជួបសវនាការ និងទទួលអំណោយសប្បុរសជន នៅទីស្នាក់ការ កណ្តាលកាកបាទក្រហមកម្ពុជា រួមមាន៖
1.សម្តេចព្រះអគ្គមហាសង្ឃរាជាធិបតី ទេព វង្ស សម្តេចព្រះមហាសង្ឃរាជ
2.ឧកញ៉ា គិត ធាង
3.លោក Grebenyuk Vasily ប្រធានក្រុមហ៊ុន មេគង្គ ខនសាល់ធីង សីវីស
នៅក្នុងជំនួបសវនាការនោះ លោកជំទាវកិត្តិព្រឹទ្ធបណ្ឌិត បានសំដែងនូវការស្វាគមន៍យ៉ាងកក់ក្តៅចំពោះ គណៈប្រតិភូសប្បុរសជន ដែលបានមានសន្តានចិត្តចូលរួមនៅក្នុងការវិស័យមនុស្សធម៌ ជាមួយកាកបាទក្រហមកម្ពុជា តាមរយៈការចូលរួមជាថវិកា ។ លោកជំទាវកិត្តិព្រឹទ្ធបណ្ឌិត ក៏បានសន្យាថា នឹងធ្វើការបែង ចែកនូវថវិកាទាំងនេះ ដើម្បីបន្តជួយដល់ប្រជាជនដែលទទួលរងគ្រោះដោយសារទឹកជំនន់ រួមមាន ស្ត្រី មេមាយ ចាស់ជរាគ្មានទីពឹង កុមារកំព្រា និងអ្នកផ្ទុកមេរោគអេដស៍។
លោកជំទាវកិត្តិព្រឺទ្ធបណ្ឌិត ក៏បានជម្រាបជូនប្រតិភូទាំងអស់ថា កាកបាទក្រហមកម្ពុជា បាននឹងកំពុង បំពេញការងាររបស់ខ្លួនយ៉ាងសកម្ម និងប្រកបដោយប្រសិទ្ធភាពខ្ពស់ នៅក្នុងការចូលរួមចំណែកជាមួយ រាជរដ្ឋាភិបាល ដើម្បីធ្វើការជួយសង្គ្រោះប្រជាជន ដែលបាននិងកំពុងទទួលនូវផលប៉ះពាល់យ៉ាងខ្លាំង ដោយសារទឹកជំនន់ឆ្នាំនេះ។ បន្ថែមពីនេះទៀត ការចូលរួមជាថវិកានាពេលនេះ គឺនឹងត្រូវបានជួយកាត់បន្ថយភាពខ្វះខាត និងជួយសម្រាលនូវទុក្ខវេទនារបស់ប្រជាជនជាច្រើន ពិតជាមិនខាន។
ជាទីបញ្ចប់ លោកជំទាវកិត្តិព្រឹទ្ធបណ្ឌិត តាងនាមអោយមន្ត្រី បុគ្គលិកកាកបាទក្រហមកម្ពុជា និង ជាពិសេសជនរងគ្រោះទាំងអស់ សូមថ្លែងនូវអំណរព្រះគុណ និងអរគុណយ៉ាងជ្រាលជ្រៅ ចំពោះកាយវិការប្រកបដោយមនុស្សធម៌របស់សប្បុរសទាំងអស់នាពេលនេះ៕
អត្ថបទដោយ ៖ លោក តាំងសាមឿន
ធ្វើបច្ចុប្បន្នភាព ថៃ្ងទី ១៩ ខែ ធ្នូ ឆ្នាំ២០១១
