សាខាកក្រកខេត្តព្រះវិហារ: ព្រឹកថ្ងៃទី១១ ខែ តុលា ឆ្នាំ ២០១៧ នេះលោក វ៉ា ម៉ៅ ប្រធាន​កិត្តិយស​ក្លឹប និងទីប្រឹក្សាយុវជន​កាកបាទ​ក្រហម ​ ប្រចាំវិទ្យល័យ ស្រុកជាំក្សាន្ត បានដឹកនាំ​យុវជន ចំនួន ៧៥នាក់ ស្រី៥៣ ធ្វើ​យុទ្ធនាការ ដើរ​រើសសំរាម ​នៅតាមដង​ផ្លូវសាធាណ: ទីប្រជុំជន​ នៅជុំវិញផ្សារ មណ្ឌលសុខភាព និងសាលា​ស្រុកជាំក្សាន្ត ​ស្ថិតនៅ​ក្នុង ស្រុក​ជាំក្សាន្ត ​ខេត្តព្រះវិហារ។

យុទ្ធនាការនេះធ្វើឡើងក្នុងគោលបំណង រួមគ្នាសម្អាតទីរួមស្រុក សំដៅឱ្យមានសោភ័ណភាពល្អ មានអនាម័យត្រឹមត្រូវ និងជាការដាស់អារម្មណ៍ដល់ប្រជាជនឱ្យចូលរួមសម្អាតនិងមានអនាម័យល្អហើយក៏ជាការទាក់ទាញ​អារម្មណ៍និងការផ្លាស់ប្តូរឥរិយាបទពីការចោលសំរាម​ទី​សាធារណៈ​​មកដាក់ទីកន្លែងត្រឹមត្រូវផងដែរ។ យុទ្ធនាការនេះរៀបចំឡើងចាប់ពីម៉ោង ៨ ព្រឹក ដល់ម៉ោង ១១ ថ្ងៃត្រង់។​

សាខាកក្រកខេត្តកំពង់ស្ពឺ ៖ កាលពីព្រឹកថ្ងៃទី ១០ ខែ តុលា ឆ្នាំ ២០១៧ សាខា កាកបាទក្រហម​កម្ពុជា ខេត្តកំពង់ស្ពឺ​ ដឹកនាំ ​ដោយលោកស្រី​ អោម ចន្នា នាយិកា​សាខា និងសហការី ​បានអញ្ជេីញ​ចុះសួរសុខទុក្ខ ​និងនាំយកអំណោយ​មនុស្សធម៌​របស់កាកបាទក្រហម​កម្ពុជា ចែកជូន​ដល់គ្រួសារ​ងាយរងគ្រោះ​បំផុតចំនួន ៤គ្រួសារ ស្ថិតនៅភូមិ​ជ័យថ្មី ឃុំព្រៃក្មេង ស្រុកភ្នំស្រួច ខេត្តកំពង់ស្ពឺ។

ក្នុងឱកាស​នោះដែរ លោកស្រី នាយិកា បានពាំនាំ​នូវប្រសាសន៍​ផ្ដាំផ្ញើសួរ​សុខទុក្ខនិង​ក្ដីនឹករលឹក​ពីសំណាក់សម្ដេច​កិត្តិព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា ដែលជា​និច្ចកាល សម្ដេច​តែងតែគិតគូរ​សុខទុក្ខ​បងប្អូនប្រជាពលរដ្ឋ​ក្រីក្រ ដែលមាន​ទុក្ខលំបាក ចាស់ជរា ទីទ័លក្រ ដោយមិន​ប្រកាន់រើសអើងវណ្ណៈ ជាតិសាសន៍​ ពណ៍សម្បុរ ឬនិន្នាការ​នយោបាយអ្វីឡើយ។

អំណោយ​ដែលផ្ដល់​ជូនរួមមាន ៖ អង្ករ ៥០គីឡូក្រាម មី ២កេស ត្រីខ ១០កំប៉ុង ប្រេងឆា ១ដប ទឹកត្រីទឹកស៊ីអ៉ីវ ២យួរ ប្រេងឆា ១ដប​ ធំធុង ២ធុង ទឹកដោះ​គោខាប់ ២កំប៉ុង ទឹកដោះ​គោឆៅ ១យួរ និងថវិកាចំនួន ៩០,០០០រៀល៕

សាខាកក្រកខេត្តកំពត ៖ ថ្ងៃទី ១០ ខែ តុលា ឆ្នាំ ២០១៧ សាខា​កាកបាទក្រហម​កម្ពុជា ខេត្តកំពត ដឹកនាំដោយលោក​វេជ្ជ.កែវ សុផាន់ នាយកសាខា ​និងសហការី បាននាំយក​កង់ សំលៀកបំពាក់ និងសម្ភារសិក្សា ជាអំណោយ​របស់សប្បុរសជន​មកពី​ប្រទេសអូស្រ្តាលី តាមរយៈ​កាកបាទក្រហម​កម្ពុជា ខេត្តកំពត ទៅចែកជូន​ដល់កុមារ​ដែលរងគ្រោះ​ដោយសារ​មេរោគអេដស៍ និងជំងឺអេដស៍​ចំនួន ៩នាក់ ស្ថិតនៅ​ស្រុកឈូក​ ខេត្តកំពត។

នាឱកាសនោះ លោកនាយក បានពាំនាំ​មកនូវការ​ផ្តាំផ្ញើសួរ​សុខទុក្ខពីសំណាក់​សម្តេចកិត្តិព្រឹទ្ធបណ្ឌិត​ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា ​ដែល​ជានិច្ចកាល​សម្តេចតែង​តែគិតគូរពី​សុខទុក្ខរបស់​បងប្អូនប្រជាពលរដ្ឋ ដែលជួបការ​លំបាក ទីទ័លក្រ មានជងឺ ដោយមិន​ប្រកាន់រើសអើង​ជាតិសាសន៍ វណ្ណៈ ពណ៌សម្បុរ ឬនិន្នាការ​នយោបាយ​អ្វីឡើយ និងសូម​ឲ្យបងប្អូន​ប្រជាពលរដ្ឋ​ទាំងអស់​ខិតខំ​ថែរក្សា​សុខភាពបានល្អ និងរស់នៅប្រកប​ដោយអនាម័យ។

សាខាកក្រកខេត្តកំពង់ស្ពឺ ៖ កាលពីព្រឹកថ្ងៃទី ៩ ខែ តុលា ឆ្នាំ ២០១៧ សាខា​កាកបាទក្រហម​កម្ពុជា ខេត្តកំពង់ស្ពឺ ដឹកនាំ​ដោយ ឯកឧត្តម តុង សេង ប្រធាន​គណៈកម្មាធិការ​សាខា ​និងសហការី​ បានអញ្ជើញ​ចុះសួរសុខទុក្ខ និងនាំយកអំណោយ​មនុស្សធម៌​របស់​កាកបាទក្រហម​កម្ពុជា ចែកជូន​បងប្អូន​ប្រជាពលរដ្ឋ​ងាយរងគ្រោះចំនួន ៥២គ្រួសារ មកពីភូមិចំនួន១៧ (ទីកន្លែងចែកនៅវត្តអង្គតាព្រះ) ឃុំមហា​ឫស្សី ស្រុកគងពិសី ខេត្តកំពង់ស្ពឺ។

ក្នុងឱកាសនោះដែរ ឯកឧត្តម​ប្រធាន ​បានពាំនាំ​នូវប្រសាសន៌​ផ្តាំផ្ញើសួរ​សុខទុក្ខពី​សំណាក់​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន​កាកបាទក្រហម​កម្ពុជា ដែល​ជានិច្ចកាល សម្តេច​តែងតែ​គិតគូ​ពីសុខទុក្ខរបស់បងប្អូន​ប្រជាពលរដ្ឋ​ក្រីក្រ​មានទុក្ខលំបាក​ និងជនងាយរង​គ្រោះដោយ​គ្រោះមហន្តរាយ​ផ្សេងៗ ដោយមិនប្រកាន់វណ្ណៈ ជាតិសាសន៌ ពណ៌សម្បុរ ឫនិន្នាកានយោបាយ​អ្វីឡើយ ហើយសូម​បង​ប្អូនប្រជាពលរដ្ឋខិតខំថែរក្សា​សុខភាព​អោយបាន​ល្អនិងរស់នៅប្រកប​ដោយអនាម័យ និងប្រកាន់ខ្ជាប់​នូវ ហូតស្អាត ផឹកស្អាត រស់នៅស្អាត។

អំណោយដែល​បានផ្ដល់ជូនរួមមាន ៖ អង្ករ ២៥គីឡូ មី ១កេស ត្រីខ ១០កំប៉ុង ប្រេងឆា ១ដប ទឹកត្រីទឹកស៊ីអ៉ីវ ១យួរ ធំធុង ១ធុង ទឹកដោះគោខាប់ ១កំប៉ុង និងថវិកាចំនួន ២០,០០០រៀល៕

សាខាកក្រករាជធានីភ្នំពេញ៖ នាល្ងាចថ្ងៃទី​ ១០ ខែ​ តុលា​ ឆ្នាំ ២០១៧នេះ នៅ​វត្តនន្ទមុនី ​សាខា​កាកបាទក្រហម​កម្ពុជា រាជធានីភ្នំពេញ ​ដឹកនាំដោយ​ ឯកឧត្តម​ ប៉ា​ សុជាតិវង្ស ​សមាជិកគណៈកម្មាធិការ​កណ្តាលកាកបាទក្រហម​កម្ពុជា​ និងជាប្រធាន​គណៈកម្មាធិការ​សាខា​រាជធានីភ្នំពេញ ​បានចុះសាកសួរ​សុខទុក្ខ​ និងនាំយកអំណោយ​មនុស្សធម៌​ទៅចែកជូន​ដល់​ចាស់ជរា​គ្មានទីពឹង​ ជនពិការ​ ប្រជាពលរដ្ឋ​ដែលមានជីវភាព​ខ្វះខាតចំនួន​២០០គ្រួសារ រស់នៅ​ក្នុងខណ្ឌមានជ័យ ។

មានប្រសាសន៍​ទៅកាន់​លោកតា​លោកយាយ​បងប្អូន​ប្រជាពលរដ្ឋ​ទាំងអស់​ ឯកឧត្តម ប៉ា​ សុជាតិវង្ស បានពាំនាំ​នូវការផ្ដាំផ្ញើ​សួរសុខទុក្ខ​ពីសំណាក់​សម្ដេច​កិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន​កាកបាទក្រហម​កម្ពុជា​ ដែលសម្តេច​ប្រធានតែងតែ​យកចិត្តទុកដាក់​គិតគូរ​ជាប់ជានិច្ច​ចំពោះសុខទុក្ខ​ប្រជាពលរដ្ឋជាទូទៅ ជាពិសេសជនរងគ្រោះ និងងាយរងគ្រោះ​គ្រប់ប្រភេទ ដោយមិនប្រកាន់​ពីវណ្ណៈ ពណ៌សម្បុរ ជំនឿសាសនា ឬនិន្នាការនយោបាយ​អ្វីឡើយ ពោល "កាកបាទក្រហម​កម្ពុជា​មាន​គ្រប់ទីកន្លែង សម្រាប់​គ្រប់ៗគ្នា" ។ ឯកឧត្តមប្រធានគណៈកម្មាធិការសាខា ក៏សូមអំពាវនាវ​ដល់ប្រជាពលរដ្ឋ​ទាំងអស់​ឲ្យយកចិត្តទុកដាក់ពី​សុខភាព​រក្សា​ឲ្យបាន​នូវអនាម័យ​ទាំងការរស់នៅ​ និងការហូបចុច​ ដើម្បីចៀសវាង​ពីជម្ងឺដង្កាត់​ផ្សេងៗមកបៀតបៀន​ ព្រមទាំងចៀសវាង​ឲ្យឆ្ងាយ​ពីអំពើ​អសកម្មនានា​ដែលសង្គមជាតិ​ស្អប់ខ្ពើម​ ដើម្បីឲ្យ​ភូមិ-សង្កាត់យើង​មានសុវត្ថិភាព​ ហើយសូមបើកបរ​ត្រូវគោរព​ច្បាប់ចរាចរណ៍ឲ្យ​បានខ្ជាប់ខ្ជួន ដើម្បីចៀសវាង​ពីគ្រោះថ្នាក់ចរាចរណ៍​ដែលអាច​ឡើងជាយថាហេតុ ។

អំណោយមនុស្សធម៌​ដែល​បានចែក​ជូនក្នុង១គ្រួសារៗទទួល​បាន៖​ អង្ករ២០គីឡូក្រាម​ មី១កេស ទឹកក្រូច៥កំប៉ុង ទឹកបរិសុទ្ធ១កេស ទឹកត្រី២ដប ត្រីខ៥កំប៉ុង អំបិល១កញ្ចប់ និងថវិកាចំនួន៥ម៉ឺនរៀល ៕

សាខាកក្រកខេត្តព្រះវិហារ: នៅរសៀលថ្ងៃទី១០ ខែ តុលា ឆ្នាំ២០១៧ នេះ គណ:កម្មាធិការសាខាកាកបាទក្រហមកម្ពុជាខេត្តព្រះវិហារ បានរៀបចំកិច្ចប្រជុំបូកសរុបរបាយការណ៌ត្រីមាសទី៣ ឆ្នាំ ២០១៧ និងលើកទិសដៅផែនការត្រីមាសទី៤បន្ត ក្រោមវត្តមាន លោក រ៉ាត់ សោភា អនុប្រធានគណ:កម្មាធិការសាខា នៅសាលាប្រជុំសាខាកាកបាទ ក្រហមកម្ពុជាខេត្តព្រះវិហារ។

កិច្ចប្រជុំនេះបានពិនិត្យមើលរាល់សកម្មភាពមនុស្សធម៌របស់ខ្លួនក្នុងរយៈពេល៣​ខែកន្លងមក នូវចំណុចខ្វះខាត និង ចំណុចខ្លាំង និងទិសដៅបន្ត សំដៅសម្រាប់៣​ខែខាងមុខទៀត។

កក្រក ៖ កាកបាទក្រហម​កម្ពុជា ដែលមាន​សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជា​ប្រធាន ផ្ដល់អំណោយ​មនុស្សធម៌​ជូនគ្រួសាររងគ្រោះ ដោយសារ​ទឹកជំនន់​ចំនួន ៧៤៩គ្រួសារ ដែលរស់​នៅក្នុង​ឃុំចំនួន ៨ នៃ​ស្រុកស្ទោង ខេត្តកំពង់ធំ។

ពិធីសំណេះ​សំណាល​សួរសុខទុក្ខ និងចែក​អំណោយ​នេះប្រព្រឹត្ត​ទៅរយៈពេល​២ថ្ងៃ ចាប់ពី​ថ្ងៃទី៩-១០ ខែតុលា ឆ្នាំ២០១៧ នៅទីតាំង ៤ផ្សេងគ្នា​ រួមមាន ៖ 

១-ក្នុង​បរិវេណវត្ត​ឈើទាល សម្រាប់​ប្រជាពលរដ្ឋ​ចំនួន ១៧១ គ្រួសារ 
២-ក្នុងបរិវេណ​វត្តថ្មី សម្រាប់​ប្រជាពលរដ្ឋ​ចំនួន ២៣៤គ្រួសារ 
៣-ក្នុងបរិវេណ​វត្តព្រះដំរី សម្រាប់​ប្រជាពលរដ្ឋ​ចំនួន ៣១៦ គ្រួសារ 
៤-សាលាឆទានភូមិនាងសល្ងាច សម្រាប់ប្រជាពលរដ្ឋចំនួន ២៨ គ្រួសារ

ក្នុងឱកាស​សំណេះសំណាល​នោះ លោកជំទាវ ពុំ ចន្ទីនី អគ្គលេខាធិការ កាកបាទក្រហម​កម្ពុជា បានពាំនាំសេចក្ដីផ្តាំផ្ញើ​ការសួរ​សុខទុក្ខ និងសេចក្ដី​នឹករលឹក ​របស់ សម្តេច​កិត្តិព្រឹទ្ធបណ្ឌិត ប្រធាន ជូន​ចំពោះគ្រួសាររងគ្រោះ ដែលមក​ទទួលអំណោយ​មនុស្សធម៌ នាថ្ងៃនេះ។ ជាមួយគ្នានេះ​ លោកជំទាវ​អគ្គលេខាធិការ បានមានប្រសាសន៍ថា ប្រជាពលរដ្ឋ​សព្វកំពុងរស់​នៅក្រោមម្លប់​សន្តិភាព​បរិបូរណ៍នេះ ត្រូវចេះ​ថែរក្សា​សុខភាពឱ្យបានល្អប្រសើរ​ ដោយត្រូវរស់នៅ​ស្អាត និងពិសារ​ទឹកឆ្អិន​ជានិច្ច ជាពិសេសស្ត្រី​មានផ្ទៃពោះ​ត្រូវទៅពិនិត្យសុខភាពឱ្យបាន​ទៀងទាត់។ បន្ថែម​ពីនេះទៀត សូមមើល​ថែរក្សា​កូនចៅ​តូចឱ្យបានល្អ ​ជៀសវាង​គ្រោះថ្នាក់ផ្សេងៗ និងត្រូវដាំ​បន្លែដំណាំ​ជុំវិញផ្ទះឱ្យ​បានច្រើន សម្រាប់​ទទួលទាន​ក្នុងក្រុមគ្រួសារ ជាជាង​ទិញបន្លែពីផ្សារ។ ជាងនេះទៅ​ទៀត សូមជៀស​ឱ្យឆ្ងាយពី​គ្រឿងញៀន គ្រឿងស្រវឹង និងត្រូវមាន​ស្មារតីប្រុង​ប្រយ័ត្នជានិច្ចរាល់ពេល​ធ្វើដំណើរទោះជិត ឬឆ្ងាយ និងគោរពច្បាប់​ចរាចរណ៍ឱ្យ​បានខ្ជាប់ខ្ជួន។

ប្រជាពលរដ្ឋរងគ្រោះទាំងអស់ ដែលមក​ទទួលផល បានសម្តែង​នូវក្តីរំភើប​ឥតឧបមា និងដឹងគុណ​យ៉ាងជ្រាលជ្រៅ​ចំពោះ កាកបាទក្រហម​កម្ពុជា ដែលមាន សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតា​ជាតិខ្មែរ គង់ប្រថាប់​ជាព្រះប្រធាន​កិត្តិយស និងសម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ជានិច្ចកាល​យកព្រះទ័យ និងយកចិត្ត​ទុកដាក់ ចំពោះសុខទុក្ខ​ប្រជាពលរដ្ឋ​ជួបការលំបាក​ដោយមិនរើសអើង មិនប្រកាន់វណ្ណៈ ពូជសាសន៍ ព័ណ៌សម្បុរ ឬនិន្នាកា​រនយោបាយអ្វីឡើយ។

អំណោយ​ដែលគ្រួសារនីមួយៗទទួលបានរួមមាន៖ អង្គរ៣០គីឡូក្រាម មី១កេស ត្រីខ១០កំប៉ុង មុង១ ភួយ១ សារុង១ ក្រមា១។ ដោយឡែក​ចាស់ៗមួយ​ចំនួនទទួលបានថវិកា​ឧបត្ថម្ភបន្ថែម ម្នាក់ៗចំនួន ១ម៉ឺនរៀល៕

កក្រក​ ៖​ នៅព្រឹកថ្ងៃទី​ ១០​ ខែតុលា​ ឆ្នាំ២០១៧​ នេះ​ កាកបាទក្រហមកម្ពុជា​ បានរៀបចំកិច្ចប្រជុំ​ សំណេះសំណាល​ជាមួយ​យុវជន​កាកបាទក្រហម​កម្ពុជា-សិស្សចំនួន​ ៨៤អង្គ/នាក់​ ដែលទទួលបានអាហារូបករណ៍របស់​ សម្តេច​អគ្គមហា​សេនា​បតីតេជោ​ ហ៊ុន​ សែ​ន​ និងសម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ សម្រាប់ឆ្នាំសិក្សា​ ២០១៧-២០១៨។

ក្នុងឱកាសសំណេះសំណាលនោះ​ ឯកឧត្តម​ សម​ កុសល​ នាយក​នាយកដ្ឋាន​ធនធានមនុស្ស​កាកបាទក្រហមកម្ពុជា​ បានពាំនាំ​ប្រសាសន៍​ផ្តាំផ្ញើ​សួរសុខទុក្ខ​ពីសំណាក់​ សម្តេច​កិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ ប្រធាន​កាកបាទក្រហម​កម្ពុជា​ និងផ្តាំផ្ញើការកោត​សរសើរចំពោះ​ក្មួយៗយុវជន​កាកបាទក្រហមកម្ពុជាទាំងអស់​ ដែលបានលះបង់កម្លាំងកាយ-ចិត្ត​ ចូលរួមចំណែក​ក្នុងកិច្ចការសង្គម​ ធ្វើជាយុវជនគំរូ​ ជាមិត្តអប់រំមិត្តនៅតាមសាលារៀន​ និងជាភ្នាក់ងារ​នៃការផ្លាស់ប្តូរ​ឥរិយាបថ​នៅក្នុងសង្គមជាតិ។

ជាកិច្ចតបស្នង​ចំពោះទឹកចិត្តដ៏ថ្លៃថ្លារបស់​ សម្តេចកិត្តិព្រឹទ្ធបណ្ឌិត​ ប៊ុន​ រ៉ានី​ ហ៊ុនសែន​ យុវជន-សិស្សក្រីក្រដែល​ទទួលបាន​អាហារូបករណ៍​ទាំងអស់​ បានប្តេជ្ញាចិត្ត​ខិតខំ​ប្រឹងប្រែងរៀនសូត្រ​ឱ្យបាន​ពូកែ​ បន្តជីវភាពជាយុវជន​កាកបាទក្រហម​កម្ពុជានៅសាកល​វិទ្យាល័យ​ ដើម្បីបន្តបេសកកម្ម​មនុស្សធម៌​របស់ខ្លួន​ដែលបាន​និងកំពុងធ្វើ​កន្លងមក៕

សាខាកក្រកខេត្តកំពង់ធំ ៖ នៅព្រឹកថ្ងៃទី៩ ខែតុលា ឆ្នាំ២០១៧ នេះ សាខា​កាកបាទក្រហម​កម្ពុជា ខេត្តកំពង់ធំ បានរៀបចំ​កិច្ចប្រជុំ​ស្ដីពី ​បច្ចុប្បន្នភាព​នៃការពង្រឹង​សមត្ថភាពសាខា​ ក្រោមអធិបតីភាព​ លោកជំទាវ ពុំ ចន្ទីនី​ អគ្គលេខាធិការ កាកបាទក្រហម​កម្ពុជា និងឯកឧត្ដម​ សុខ លូ ប្រធាន​គណៈកម្មាធិការ​សាខា​ និងមានការអញ្ជើញ​ចូលរួម​ពីសំណាក់​ ព្រមទាំង សមាជិក-សមាជិកា គណៈកម្មាធិការ​សាខា ​មន្ត្រីថ្នាក់កណ្ដាល​ និងក្រុមប្រតិបត្តិ​សាខា សរុប​ចំនួន៣២នាក់។

កិច្ចប្រជុំនេះ​មានគោលបំណង​សំខាន់ៗ​ចំនួន ៤ រួមមាន ៖

១- ការកសាងធនធាន​មនុស្ស និងការរៀបចំ​តួនាទី​ភារកិច្ច របស់ក្រុម​ប្រតិបត្តិ​ទៅតាម​សមត្ថភាព និង​ជំនាញរបស់​បុគ្គលម្នាក់ៗ។ 
២-ទម្រង់ការហិរញ្ញវត្ថុ ​ដោយត្រូវមាន​របាយការណ៍​ហិរញ្ញវត្ថុ​ច្បាស់លាស់ ដោយ​ធ្វើយ៉ាងណា​ឱ្យមានតម្លាភាពនិងប្រសិទ្ធភាព​នៃ​ការប្រើប្រាស់​ថវិកា ព្រមទាំងត្រូវ​កត់ត្រា រាល់ចំណូល-​ចំណាយ និងចរន្តហិរញ្ញវត្ថុត្រូវដាក់ទៅ​តាមផ្នែក​នីមួយៗ សម្រាប់ទ្រទ្រង់​សកម្មភាព​របស់សាខា។ 
៣-ការរៀបចំ​រចនា​សម្ព័ន្ធ តួនាទី និងភារកិច្ច​ របស់មន្ត្រី-បុគ្គលិកសាខា។ 
៤-លក្ខខណ្ឌការងារ និងប្រាក់​បេសកកម្ម​ក្នុងនិងក្រៅប្រទេស​ របស់កាកបាទក្រហម​កម្ពុជា។

ជាមួយគ្នា​នោះដែរ លោកជំទាវ​អគ្គលេខាធិការ​ បានអញ្ជើញ​ប្រគល់ឧបករណ៍​បន្សុទ្ធទឹក និងសម្លាប់​មេរោគក្នុងទឹក ម៉ូដែល AP 700 CL ចំនួន ២ ឈុត ជូនដល់សាខា​កាកបាទក្រហម​កម្ពុជា ខេត្តកំពង់ធំ ​ដែលជាជំនួយ​របស់សហព័ន្ធ​អន្តរជាតិ កាកបាទក្រហម​ អឌ្ឍចន្ទក្រហម​ ផងដែរ៕

កក្រក​ ៖​ នៅថ្ងៃទី ៨​ ខែតុលា​ ឆ្នាំ២០១៧ នេះ កាកបាទក្រហមកម្ពុជា ដែលមាន​ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានឧបត្ថម្ភសម្ភារៈប្រើប្រាស់ និងថវិកាមួយចំនួន ក្នុងឱកាសចុះសួរសុខទុក្ខ​ ស្ត្រី​ទីទ័លក្រឈ្មោះ​ លន់​ រាជនី​ អាយុ​ ២១ឆ្នាំ​ ជាអ្នករើសអេតចាយ​ជាមួយម្តាយ​ចាស់​ រស់នៅភូមិព្រែកតាគង់​ សង្កាត់ចាក់អង្រែលើ​ ខណ្ឌច្បារអំពៅ​។​ ស្ត្រីនេះ​ ទទួលបានការជួយ​សម្រាលលើរ៉ឺម៉កកង់បី​ នៅវេលាម៉ោង​ ១ម៉១៥នាទីរសៀល​ ដោយពេទ្យឆ្មប​ យិន​ រមនី​ និងបានបញ្ជូនមក​សម្រាកថែទាំ​ក្រោយសម្រាល​នៅមណ្ឌលសុខភាព​ផ្សារដើមថ្កូវ​។​ ពេលនេះ​ ម្តាយនិងទារក​ មានសុខភាពល្អប្រសើរ។

ក្នុងឱកាសចុះសួរ​សុខទុក្ខនោះ លោកជំទាវ ម៉ែន នារីសោភ័គ​ អគ្គលេខាធិការរងទី ១ កាកបាទក្រហម​កម្ពុជា បានពាំនាំនូវ​ប្រសាសន៍​របស់ សម្តេច​កិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែល​ផ្តាំផ្ញើនូវ​ការសួរសុខទុក្ខ​ និងក្តីអាណិត​អាសូរ​ ចំពោះអ្នកស្រី​ លន់​ រាជនី​ និងផ្តាំផ្ញើ​ឱ្យខិតខំបំប៉ន​សុខភាព​ឱ្យបានល្អ​ បរិភោគអាហារមានជីរជាតិ​ មានអនាម័យ​ស្អាតក្នុង​ការថែទាំកូន និងអនុវត្តតាម​ការណែនាំ​របស់គ្រូពេទ្យ​។

អ្នកស្រី​ លន់​ រាជនី​ មានក្តីរំភើបឥតឧបមា​ ដោយបានការ​យកចិត្តទុកដាក់​ គិតគូរទាន់​ពេលវេលា​ពី​ កាកបាទក្រហមកម្ពុជា ក្រោមការដឹកនាំ​របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជានិច្ចកាល​ តែងគិតគូរជួយសម្រាល​ទុក្ខលំបាក​ដល់ប្រជាពលរដ្ឋ​ជួបការលំបាក​ ដោយមិនមាន​ការរើសអើង​ មិនប្រកាន់វណ្ណៈ​ ពូជសាសន៍​ ព័ណ៌សម្បុរ​ ឬនិន្នាការនយោបាយអ្វីឡើយ​។

អំណោយផ្តល់ជូនរួមមាន​ ៖​ ខោអាវ​និងសម្ភារៈចាំបាច់​ ១៦​មុខ​​ ម្សៅកូនក្មេង​ ត្រីខ​ មី​ មុង​ ភួយ​ សារុង​ ក្រមា​ និងថវិកា​ ២០​ មុឺន​ រៀល​។​ ដោយឡែក​ អ្នកឆ្លងទន្លេម្នាក់ទៀតនៅក្បែរនោះ​ទទួលបាន មី​ ត្រីខ​ ឃីត​ ម្សៅកូនក្មេង​ និងថវិកា​ ៥​មុឺនរៀល​ដែរ៕