អ៊ីម៉ែល​ កាកបាទក្រហមកម្ពុជា
វីដីអូ កាកបាទក្រហមកម្ពុជា
សេចក្តីជូនដំណឹងស្តីពីការវះកាត់ ឆែបមាត់ ឆែបក្រអម មាត់ធ្មេញ និងពិការមុខមាត់ផ្សេៗ
ក្រាំងមាសអក្សរសាស្ត្រសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន
jQuery Carousel
ព័ត៌មានថ្មីៗ
...

ប្រជាពលរដ្ឋងាយរងគ្រោះដោយអគ្គិភ័យនៅខេត្តកំពង់ស្ពឺទទួលអំណោយពីកាកបាទក្រហមកម្ពុជា

កក្រក ៖​នៅរសៀល​ថ្ងៃទី១១​ ខែមីនា ​ឆ្នាំ២០១៧​ នេះ​ កាកបាទក្រហម​កម្ពុជា​ ដែលមាន​សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន​ ជាប្រធាន​ បានផ្តល់​គ្រឿងឧបភោគ​-បរិភោគ​ សម្ភារៈ​ប្រើប្រាស់​ និង​ថវិកាមួយ​ចំនួន​ជូន​គ្រួសារ​រងគ្រោះ​ចំនួន៣គ្រួសារ​ ដែលបាន​ទទួល​រងគ្រោះ​ដោយភ្លើង​ឆេះផ្ទះ​ ចំនួន​៣ខ្នង​ស្ថិត​នៅភូមិញរ​ សង្កាត់​កណ្តោលដុំ ​ក្រុងច្បារមន​ ខេត្តកំពង់ស្ពឺ។

 

ក្នុងឱកាសនោះ ​លោកជំទាវ ម៉ែន នារីសោភ័គ​ អគ្គលេខាធិការ​រងទី ១​ កាកបាទក្រហម​កម្ពុជា​ បានពាំនាំ​ប្រសាសន៍​ សម្តេច​កិត្តិព្រឹទ្ធបណ្ឌិត​ ប៊ុន រ៉ានី​ ហ៊ុនសែន​ ប្រធាន​កាកបាទក្រហម​កម្ពុ​ជា ដែលផ្តាំ​ផ្ញើសួរ​សុខទុក្ខ​ ក្តីអាណិតអាសូ​រ និង​ការសោកស្តាយ ​ចំពោះឧបទ្ទវហេតុ​ដែលបាន​បំផ្លាញ​លំនៅដ្ឋាន​ និងទ្រព្យសម្បត្តិ​របស់គ្រួសារ​រងគ្រោះ​។ លោកជំទាវ​ ក៏បាន​អំពាវនាវ​ ដល់ប្រជាជន​ សូមមាន​ការប្រុងប្រយ័ត្ន​ចំពោះ​ការប្រើប្រាស់​ភ្លើង​ និងចរន្ត​អគ្គិសនី​ ដែលជា​ប្រភព​នៃគ្រោះថ្នាក់ ​និងបាន​លើកទឹកចិត្ត​សូមកុំ​អស់សង្ឃឹម ​ហើយប្រឹងប្រែង​ប្រកប​របរចិញ្ចឹម​ជីវិត ​ដើម្បីស្តារ​សេដ្ឋកិច្ច​គ្រួសារ​ឡើងវិញ​ ព្រោះអំណោយ​ដែលបាន​ផ្តល់ជូន​ពេលនេះ ​អាចជួយ​សម្រាល​ការលំបាក​បានមួយ​គ្រាប៉ុណ្ណោះ។

 

គ្រួសារ​រងគ្រោះ​ទាំងអស់​បានថ្លែង​អំណរគុណ​យ៉ាងជ្រាលជ្រៅ​ចំពោះសម្តេច​កិត្តិព្រឹទ្ធ​បណ្ឌិត​ប្រធាន​កាកបាទក្រហម​កម្ពុជា​ ដែលបាន​គិតគូរ​ មានក្តីមេត្តា ​ករុណា ​និងទឹកចិត្ត​ជ្រះថ្លា ​ជួយដោះស្រាយ​ទុក្ខលំបាក​ដល់ប្រជាជន​រងគ្រោះ​ជួបការ​លំបាក​បានទាន់​ពេលវេលា៕

 

...

ប្រជាពលរដ្ឋងាយរងគ្រោះនៅខេត្តកំពង់ស្ពឺទទួលអំណោយពីកាកបាទក្រហមកម្ពុជា

កក្រក​៖​នៅក្នុង​ឱកាស​នៃពិធី​សំណេះសំណាល​សួរសុខទុក្ខ​ និងផ្តល់​អំណោយ​មនុស្សធម៌​ ជូនដល់​អ្នករស់​នៅជាមួយ​មេរោគអេដស៍​ ចាស់ជរាគ្មាន​ទីពឹង​ ស្ត្រីមេម៉ាយ​ គ្រួសារ​ទីទ័លក្រ​ កុមារកំព្រា ​និងគ្រួសារ​ជនពិការ​ចំនួន១២៨៨គ្រួសារ​ នៅស្រុក​ឱរ៉ាល់​ ខេត្តកំពង់ស្ពឺ​ នៅព្រឹកថ្ងៃទី១១​ ខែមីនា ឆ្នាំ២០១៧​ នេះ សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ប្រធាន​កាកបាទក្រហម​កម្ពុជា បានថ្លែង​បញ្ជាក់​ទៅកាន់​ប្រជាពលរដ្ឋ​ថា​ "បេសកកម្ម​របស់​កាកបាទក្រហម​កម្ពុជា​ បានធ្វើ​ឡើងជាយូរ​ណាស់​មកហើយ​ គិតចាប់តាំង​ពីជួយ​ជំលៀសជនភៀសសឹក​នៅក្នុង​សម័យសង្គ្រាម​ឱ្យមានទី​មានសុវត្ថិភាព​ និងជួយ​សម្រាល​ទុក្ខលំបាកជូន​ប្រជាពលរដ្ឋរងគ្រោះ​ និងងាយរងគ្រោះ​បំផុត​ ជាបន្តបន្ទាប់​ គ្រប់ពេលវេលា​ ដោយមិនរើសអើង​ មិនប្រកាន់វណ្ណៈ​ ពូជសាសន៍​ ព័ណ៌សម្បុរ​ ឬនិន្នាការ​នយោបាយអ្វីឡើយ"។

 

ទន្ទឹមនឹងនោះ​ សម្តេច​កិត្តិព្រឹទ្ធបណ្ឌិត​ប្រធាន​ បានផ្តល់​អនុសាសន៍​សំខាន់​ដូច​ខាងក្រោម​ ៖

 

១/​សូមយុវជន​កាកបាទ​ក្រហម​កម្ពុជា ត្រូវធ្វើ​ជាគំរូ​ល្អដល់​យុវជន ឬសិស្ស​ដទៃ ដោយជួយ​អូសទាញ​សិស្ស​នានា​ឱ្យដើរ​ក្នុងផ្លូវ​ត្រឹមត្រូវ​របស់សង្គម​ និងចូលរួម​កាន់តែ​សកម្ម​ក្នុងការងារ​មនុស្សធម៌​នៅតាម​សាលារៀន​ ឬសហគមន៍​របស់ខ្លួន​ ដើម្បី​ឆ្លើយតប​តាមតម្រូវការ​ដល់ជន​រងគ្រោះ ​និងងាយ​រងគ្រោះ ប្រកប​ដោយ​ប្រសិទ្ធភាពខ្ពស់។

 

២/​សូមប្រជាពលរដ្ឋ​ក្នុងគ្រួសារ​នីមួយៗ​យកចិត្តទុកដាក់​ គិតគូរ​ពីសុខភាព​រស់នៅ​ប្រចាំថ្ងៃ​ ដោយត្រូវ​ពិសារ​ទឹកឆ្អិន និងមាន​អនាម័យ​ជុំវិញផ្ទះ ​ដើម្បីជួយសម្រាលអត្រា​ឈឺក្នុងផ្ទះ​ និងលើកស្ទួយ​សេដ្ឋកិច្ច​គ្រួសារ។

 

៣/សូមអ្នក​ផ្ទុកមេរោគអេដស៍​ទាំងអស់ ​អញ្ជើញ​ទៅមណ្ឌល​សុខភាព ​ឬមន្ទីរពេទ្យ​ឱ្យបាន​ទៀងទាត់​ ទៅតាមកាលកំណត់​របស់គ្រូពេទ្យ​ ហើយបើយើង​ជាអ្នកផ្ទុក​ សូមកុំ​ចម្លងទៅ​អ្នកដទៃទៀត។​ ចំពោះអ្នក​មានផ្ទៃពោះ ​ត្រូវទៅ​ពិគ្រោះជាមួយ​គ្រូពេទ្យ និងសម្រាលកូ​ននៅមណ្ឌល​សុខភាព​ ដើម្បី​កុំឱ្យ​ឆ្លងពី​ម្តាយទៅទារក។ ចំណែកស្ត្រីមាន​ផ្ទៃពោះទូទៅត្រូវទៅ​ពិនិត្យសុខភាព​ឱ្យបានទៀងទាត់ ហើយត្រូវ​សម្រាលកូននៅ​មណ្ឌលសុខភាព ឬមន្ទីរពេទ្យ​ដើម្បីសុខភាព​ទាំងម្តាយ​ និងទារក។

 

៤/​ សូម​ប្រជាពលរដ្ឋ​ទាំងអស់​ យកចិត្តទុកដាក់​ប្រុងប្រយ័ត្នចំពោះគ្រោះថ្នាក់ចរាចរណ៍គ្រប់ពេលវេលា ដើម្បី​កាត់បន្ថយ​អត្រាស្លាប់​ និងពិការភាពដោយសារគ្រោះថ្នាក់ចរាចរណ៍។

 

៥/​សូម​ប្រជាពលរដ្ឋ​ទាំងអស់ និងអាជ្ញាធរគ្រប់លំដាប់ថ្នាក់​ ចូលរួមទប់ស្កាត់​ និងលុបបំបាត់គ្រឿងញៀន​ ល្បែងស៊ីសង​ គ្រឿងស្រវឹង​ -ល-​ ដែលជាមូលហេតុ​នៃអំពើហិង្សា​ក្នុងគ្រួសារ​ អំពើ​ចារកម្ម ចោរកម្ម​ និងឈានដល់សម្លាប់មនុស្សជាដើម។

 

៦/​សូមមីក្រូហិរញ្ញវត្ថុទាំងអស់​ត្រូវចេះគិតគូរ​យោគល់​ និងអាណិត​អាសូរដល់​ប្រជាពលរដ្ឋ​ដែលខ្ចី លុយយកទៅ​ប្រើប្រាស់​ក្នុងមុខរបរ​ត្រឹមត្រូវ​របស់​ពួកគាត់។

 

៧/​ សូមប្រជាពលរដ្ឋ​ ប្រុងប្រយ័ត្ន​ករណីភ្លើងផ្សែង​នៅរដូវប្រាំង​នេះ​ ដែលអាច​បង្កឧបទ្ទវហេតុ​ផ្សេងៗបាន។

 

៨/​សូមអាជ្ញាធរ​គ្រប់ជាន់ថ្នាក់​ យកចិត្តទុក​ដាក់ចុះពិនិត្យ​តំបន់ដែល​ប្រឈម​នឹងកង្វះទឹកស្អាត​ប្រើប្រាស់​ ដើម្បីស្នើ​មកសាខា​ ឬទីស្នាក់ការកណ្តាល​កាកបាទក្រហម​កម្ពុជា​ ដោះស្រាយជូន៕

 

...

ក្លឹបយុវជនកាកបាទក្រហមកម្ពុជារៀបចំតាំងពិព័រណ៍ និងតន្ត្រី សប្បុរសធម៌លើកទី៤

កក្រក៖​ នៅព្រឹក​ថ្ងៃទី​១០ ​ខែមីនា​ ឆ្នាំ២០១៧ ​ក្លឹបយុវជន​កាកបាទក្រហម​កម្ពុជា​ នៃ​វិទ្យាស្ថាន​បច្ចេកវិទ្យា​កម្ពុជា​ បានរៀបចំ​ពិធី​ពិព័រណ៍ ​និង​តន្ត្រីសប្បុរសធម៌​លើកទី៤​ របស់ខ្លួន​ក្រោមអធិបតីភាព​ ឯកឧត្តម ពិត ចំណាន សមាជិក​គណៈកម្មាធិការ​កណ្ដាល​កក្រក​ ឯកឧត្តម​បណ្ឌិត​ សាន វឌ្ឍនា តំណាង​ឯកឧត្តម​ ហ៊ុន ម៉ានី និងឯកឧត្តម អ៊ុម រម្យណី ព្រមទាំង​មានការ​ចូលរួម​ពីភ្ញៀវកិត្តិយស ​គណៈគ្រប់គ្រង​ សាស្ត្រាចារ្យ និស្សិត និងយុវជន​ កាកបាទក្រហម​កម្ពុជា ​សរុប ៦០០នាក់។

 

​ក្នុងឱកាសនោះដែរ​ ឯកឧត្តម​ពិត ចំណាន​ មាន​ប្រសាសន៍​ថា ​ការរៀបចំ​ពិធី​ពិព័រណ៍​ និង​តន្ដ្រី ​សប្បុរសធម៌​លើកទី៤​ រៀបចំ​ឡើងក្នុង​គោលបំណង​ផ្សារភ្ជាប់​នូវ​សកម្មភាព​មនុស្សធម៌​ កៀរគរ​មូលនិធិ​ពីសប្បុរសជន​សម្រាប់​ទ្រទ្រង់​សកម្មភាព​មនុស្សធម៌​ នៅក្នុង​គ្រឹះស្ថាន​ឧត្តមសិក្សា ​ចុះសាកសួរ​សុខទុក្ខ​កុមារកំព្រា​ ចាស់ជរា​ និងអ្នកជំងឺ​សម្រាក​ព្យាបាល​នៅតាមមន្ទីរ​ ពេទ្យនានា​ក្នុង​រាជធានីភ្នំពេញ​។

គួរបញ្ជាក់​ផងដែរ​ ក្នុងពិធី​ពិព័រណ៍ និង​តន្ដ្រី​សប្បុរសធម៌​លើកទី៤ នេះមាន​ការឧបត្ថម្ភ​ថវិកា​របស់​សម្ដេចកិត្តិព្រឹទ្ធ​បណ្ឌិត​ ប៊ុន រ៉ានី ហ៊ុនសែន ប្រធាន​កក្រកចំនួន៥លានរៀល,និងឯកឧត្តម​ហ៊ុន ម៉ានី ថវិកា២លានរៀល និង​សប្បុសជន​ជាច្រើន​បន្ដបន្ទាប់​ទៀត។ ក្រៅពីនេះ​ក៏មាន​ការរៀបចំ​នូវស្ដង់​ពិព័រណ៍​ម្ហូបអាហារ​ នំចំណី និង​ក្រុមហ៊ុន​មួយចំនួន​ផងដែរ៕

 

...

កាកបាទក្រហមកម្ពុជាចុះសួរសុខទុក្ខប្រជាពលរដ្ឋងាយរងគ្រោះបំផុតនៅស្រុកអូរជ្រៅ

កក្រក ៖​នៅព្រឹក​ថ្ងៃទី​៩ ​ខែមីនា​ ឆ្នាំ២០១៧​ នេះ ​ឯកឧត្តម​វេជ្ជ​. អ៊ុយ សំអាត​ នាយក​ នាយកដ្ឋាន​គ្រប់គ្រង​គ្រោះមហន្តរាយ​ កាកបាទក្រហម​កម្ពុជា​ និងមាន​ការអញ្ជើញ​ចូលរួម​ពី​ លោកជំទាវ​ ឆាន់ ច័ន្ទសោភា​ អនុប្រធាន​គណៈកម្មាធិការ​សាខា​ និង​លោកជំទាវ​ លោក លោកស្រី ​ដែលជា​សមាជិក​ សមាជិកា​ សាខានិងអនុ​សាខា​កាកបាទក្រហម​កម្ពុជា​ខេត្ត​បន្ទាយ​មានជ័យ​ បាន​ចុះ​សួរ​សុខទុក្ខ​ និងនាំយក​អំណោយ​មនុស្សធម៌​ របស់​កាកបាទក្រហមកម្ពុជា​ដែលមានសម្ដេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ជាប្រធាន​ ចែកជូន​ដល់ប្រជាពលរដ្ឋ​ងាយរងគ្រោះ​បំផុត​ចំនួន ៣៣៦​គ្រួសារ​ មកពី​ឃុំ​ចំនួន​បីរួមមានឃុំចង្ហា ឃុំសិង្ហ និងឃុំសូភី នៃស្រុកអូរជ្រៅ ខេត្ត​បន្ទាយមានជ័យ ដែលពិធី​នេះប្រព្រឹត្ត​ទៅក្នុង​បរិវេណ​វត្តពោធិ៍សម្ភារ​ជ្រៃឈូក។

 

នៅក្នុង​ឱកាស​សំណេះសំណាល​ជាមួយ​គ្រួសារ​ទទួលផលឯកឧត្តម​វេជ្ជ.​បានមាន​ប្រសាសន៍​ផ្ដាំផ្ញើ​សួរសុខ​ទុក្ខពី​សំណាក់ សម្ដេច​កិត្តិព្រឹទ្ធបណ្ឌិត​ ប្រធាន​កាកបាទ​ក្រហម​កម្ពុជា​ដល់បងប្អូន​ប្រជាពលរដ្ឋ​ងាយរងគ្រោះ​បំផុត​ទាំងអស់​ និងបាន​ណែនាំ​ដល់​បងប្អូន​សូមថែ​រក្សា​អនាម័យ​ ពិសារទឹកឆ្អិន​ និងគេងក្នុង​មុងជានិច្ច។ ជាងនេះទៅទៀត សូមបងប្អូន​ទាំងអស់​មាន​ស្មារតី​ប្រុងប្រយ័ត្ន​ជានិច្ច​នៅពេល​ធ្វើដំណើរ​ទៅទីជិត​ឬឆ្ងាយ។ បន្ថែមពី​លើនេះ​ទៀត សូមជៀស​ឲ្យឆ្ងាយ​ពីគ្រឿង​ញៀន​ និង​កុំពិសារ​គ្រឿងស្រវឹង។ រឹតតែ​ពិសេស​ជាងនេះ​ទៀត​ សូមការពារ​ខ្លួន​កុំឲ្យឆ្លង​មេរោគ​អេដស៍ និង​កុំរើស​អើង​អ្នករស់​នៅជាមួយ​មេរោគអេដស៍ ព្រមទាំងត្រូវ​មានស្មារតី​ប្រុងប្រយ័ត្ន​ជានិច្ច​នូវគ្រាប់មីន​មិនទាន់ផ្ទុះ។

 

ប្រជាពលរដ្ឋ​ងាយរង​គ្រោះទាំងអស់​ រំភើប​រីករាយ​ក្រៃលែង​ និងបាន​ថ្លែងអំណរ​គុណ​ដល់​កាកបាទក្រហម​កម្ពុជា​ដែលមាន​ សម្ដេច​ព្រះមហាក្សត្រី ​នរោត្តម ​មុនីនាថ សីហនុ ព្រះវរ​រាជមាតា​ជាតិខ្មែរ​ គង់ប្រថាប់ជាព្រះប្រធានកិត្តិយស និងសម្ដេច​កិត្តិព្រឹទ្ធបណ្ឌិត​ជាប្រធាន​ ជានិច្ចកាលតែង​តែយក​ព្រះទ័យ​ និង​ចិត្តទុកដាក់​ចំពោះប្រជាពលរដ្ឋ​ដែលងាយ​រងគ្រោះ ​គ្រប់ទិសទី​ដោយមិន​ប្រកាន់វណ្ណៈ ​ជាតិសាសន៍ ពណ៌សម្បុរ ឬនិន្នាការ​នយោបាយ​អ្វីឡើយ។

 

អំណោយ​ដែលចែក​ជូនគ្រួសារ​នីមួយៗមាន៖ អង្ករ ៣០គីឡូក្រាម មី ១កេស ត្រីខ ១០កំប៉ុង មុង១ ភួយ១ សារុង១ ក្រមា១។ ដោយឡែកអ្នកពិការ និងចាស់ជរាមួយចំនួន ទទួលបានថវិកាមួយចំនួនបន្ថែមទៀត។

...

កាកបាទក្រហមកម្ពុជាប្រគល់ផ្ទះជូនស្រ្តីទីទ័លក្រនិងមានជំងឺនៅខេត្តកំពង់ស្ពឺ

កក្រក​ ៖​នៅព្រឹក​ថ្ងៃទី​៩ ​ខែមីនា​ ឆ្នាំ២០១៧​ នេះ ​កាកបាទក្រហម​កម្ពុជា​ដែលមាន​ សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ជាប្រធាន បានប្រគល់​ផ្ទះថ្មី​១ខ្នង​ ធ្វើពីថ្ម​ប្រក់ស័ង្កសី​ មានទំហំ​៤ម៉ែត្រ​ x ៦ម៉ែត្រ​ និងត​សំយ៉ាប​មុខផ្ទះ​ប្រវែង២.៥ម៉ែត្រ​ រួមជាមួយ​បន្ទប់ទឹក​មួយទំហំ​១.៨ម៉ែត្រ​ x ២.៣ម៉ែត្រ​ជូនស្ត្រី​មេម៉ាយ​ឈ្មោះ ម៉ី សារិន អាយុ៥៣ឆ្នាំ​ ដែលមាន​ទុក្ខផ្ទួនៗ​គ្នាដោយប្តី​ឈឺស្លាប់​ កូនប្រុស​ម្នាក់​ស្លាប់​ដោយគ្រោះថ្នាក់​ចរាចរណ៍​ស្របពេល​កំពុង​ជំពាក់​បំណុល​គេ ហើយ​ត្រូវទទួល​រងគ្រោះ​ដោយសារ​ដើមអំពិល​ដួលរលំ​សង្កត់ផ្ទះ​ខូចខាត​ទាំងស្រុង​ទៀត ​កាលពី​អំឡុង​ខែតុលា ​ឆ្នាំ២០១៦​ កន្លង​ទៅ រស់​នៅភូមិ​សោកម៉ោក ឃុំអង្គ​ពពេល​ ស្រុកគងពិសី ខេត្តកំពង់ស្ពឺ។

 

ក្នុង​ឱកាសនោះ​ លោកជំទាវ​ ម៉ែន នារី​សោភ័គ​ អគ្គលេខាធិការ​រងទី១​ កាកបាទក្រហម​កម្ពុជា ​បាន​ពាំនាំ​ប្រសាសន៍​ផ្តាំផ្ញើ​គិតគូរ​ សួរសុខទុក្ខ​ ពីសំណាក់ សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ប្រធានកាកបាទក្រហ​មកម្ពុជា ដែលជា​និច្ចកាល សម្តេច តែង​ យកចិត្តទុកដាក់​ចំពោះ​ប្រជាពលរដ្ឋ​រងគ្រោះ​ជួបការលំបាក​ដោយមិន​ប្រកាន់វណ្ណៈ ​ពូជសាសន៍ ​ព័ណ៌សម្បុរ​ ឬនិន្នាការ​នយោបាយ​អ្វីឡើយ​។ លោកជំទាវ បានផ្តាំផ្ញើ​ដល់អ្នកស្រី​ ម៉ី សារិន ត្រូវថែទាំ​សុខភាព​ឱ្យបាន​ល្អ ប្រឹងប្រែង​ប្រកបរបរ​ចិញ្ចឹម​ជីវិត​ និងអប់រំ​កូនឱ្យខិតខំ​សិក្សា​រៀនសូត្រ​ដើម្បីអនាគត​ភ្លឺស្វាង​របស់ខ្លួន។

 

ទន្ទឹមនឹង​នោះ អំណោយ​សម្រាប់​សង្កត់ផ្ទះ​រួមមាន ៖ អង្ករ មី ត្រីខ ទឹកត្រី ទឹកស៊ីអ៊ីវ មុង ភួយ សារុង ក្រមា កន្ទេល ខ្នើយ ចាន ឆ្នាំង សម្ភារៈផ្ទះបាយ និងថវិកា​មួយចំនួន៕

 

Fist Prev 2 3 4 5 6 Next Last
ព័ត៌មានផ្សេងៗ
សេវាយើង

សាខាកក្រករាជធានីភ្នំពេញ៖ ​នាល្ងាច​ថ្ងៃទី​២៧​ ខែ​មីនា​ ឆ្នាំ​២០១៧​ នេះ​នៅ​វិទ្យាល័យ​អនុវត្ត​សាខា​កាកបាទក្រហម​កម្ពុជា​រាជធានី​ភ្នំពេញ​បានរៀបចំ​ពិធី​បិទ​វគ្គ​យល់ដឹង​មូលដ្ឋាន​ជូន​ដល់​ទីប្រឹក្សា​យុវជន​ និង​យុវជន​កាកបាទក្រហម​កម្ពុជា​ប្រចាំ​វិទ្យាល័យ​សរុប​ចំនួន​១១៨នាក់​ (ស្រី៥៨នាក់)​ ដោយមានការចូលរួមពីសំណាក់​លោកជំទាវ មុំ សណ្តាប់ ហេរញ្ញឹក​គណៈកម្មាធិការ​សាខា​ដែល​វគ្គយល់ដឹង​នេះបាន​ចាប់​ដំណើរ​ការអស់​រយៈពេល១​ថ្ងៃកន្លង​មក​ ។

 

នាឱកាសនោះ​ លោកជំទាវ​ហេរញ្ញឹក​គណៈកម្មាធិការ​សាខា​ បាន​ពាំនាំ​នូវ​ការ​ផ្តាំផ្ញើ​សាកសួរ​សុខទុក្ខ​ពីសំណាក់​សម្តេច​កិត្តិព្រឹទ្ធបណ្ឌិត​ប្រធាន​ ប៊ុន រ៉ានី ហ៊ុន សែន​ ជូន​ដល់​ក្មួយៗ​យុវជ​នទាំង​អស់​ ព្រមទាំង​សូមកោតសរសើរ​វាយតម្លៃ​ខ្ពស់​ចំពោះ​លទ្ធផល​នៃការ​បញ្ចប់វគ្គ​នាថ្ងៃនេះ​ ។​

 

លោកជំទាវ​សង្ឃឹម​ និងជឿជាក់ថា​ បន្ទាប់ពី​ឆ្លងកាត់​វគ្គយល់ដឹងនេះ​ហើយ​ក្មួយៗពិត​ជាបាន​យល់ច្បាស់​ពីប្រវត្តិ​ចលនា​បដិរូប​ គោលការណ៍គ្រឹះ​ទាំង៧,​ តួនាទី​ភារកិច្ច​យុវជន​កាកបាទក្រហម,​ ការគ្រប់គ្រង​គ្រោះមហន្តរាយ,​ ច្បាប់ចរាចរណ៍​ និងវិជ្ជា​សង្គ្រោះ​បឋម​ ។ល។​ ដែលជាមុខ​វិជ្ជា​មូលដ្ឋាន​សម្រាប់​ជាគ្រឹះ​ឲ្យក្មួយៗ​យកទៅ​អនុវត្ត​សំដៅ​ជួយដល់​ជនរងគ្រោះ​ និងងាយរង​គ្រោះគ្រប់​ប្រភេទ​ ក៏ដូចជា​កម្មវិធី​មិត្ត​អប់រំ​មិត្ត​ ។

 

សូម​បញ្ជាក់ថា៖​ ក្នុងវគ្គ​យល់ដឹងនេះ​ជាលទ្ធផល​យុវជន​ទទួល​បាន​និទ្ទេស​ល្អចំនួន​៨០ភាគរយ និងមធ្យម​២០ភាគរយ​ ៕

 

អានបន្ថែម...

សាខាកក្រកខេត្តស្វាយរៀង៖ ​នៅថ្ងៃ​ទី​២៧​ ខែ​មីនា​ ឆ្នាំ​២០១៧​ នៅទី​ស្នាក់ការ​សាខា​កាកបាទក្រហម​កម្ពុជា​ខេត្តស្វាយរៀង​បានរៀបចំ​ពិធី​ប្រលង​គំនូរ​កុមារ​លើកកម្ពស់​ស្នាដៃ​អំពី​សកម្មភាព​របស់​កាកបាទក្រហម​កម្ពុជា​ ដើម្បី​ចូលរួម​អបអរសាទរ​ខួបលើក​ទី១៥៤​ ទិវា​ពិភព​លោក​កាកបាទក្រហម​ អឌ្ឍចន្ទក្រហម​ ៨ ឧសភា ២០១៧ ក្រោម​ប្រធានបទ​សកម្មភាព​ចម្រុះវិស័យ​របស់​កាកបាទក្រហម​កម្ពុជា​សាខា​បានផ្សព្វផ្សាយ​នឹងណែនាំ​រូបភាព​ពីវិស័យ​ស្នួល​ទាំងបួន​ដើម្បី​ឲ្យសិស្សា​នុសិស្ស​ជ្រើសរើស​យកគំនូរ​ដែលខ្លួន​ពេញចិត្ត​សម្រាប់គូរ​រួចជ្រើសរើស​យក​អ្នកមាន​សា្នដៃ​ល្អពី​លេខ ១​ ដល់លេខ ​៣ ​យកទៅ​ប្រកូត​ប្រជែង​ទូទាំង​ប្រទេស​នៅទីស្នាក់ការ​កណ្តាល​កាកបាទក្រហម​កម្ពុជា​ ។

 

ពិធី​នេះបាន​ការអញ្ជើញ​ចូលរួម​ពីលោកជំទាវ ពៅ សុភាព ហេរ​ញ្ញិក​គណៈកម្មាធិការ​សាខា​ មន្ទីរអប់រំ​យុវជន​ និងកីឡាខេត្ត​ លោកនាយក​សាលា ​លោកគ្រូ អ្នកគ្រូ និងសិស្សានុសិស្ស​មកពី​សាលា​បឋម​សិក្សា​អនុវត្តន៍​១០នាក់ សាលា​បឋមសិក្សា​ស្វាយជ្រំ៤នាក់ និង​សាលា​បឋម​សិក្សា​ឬស្សីព្រៃ១០នាក់ សរុប ២៤នាក់ ស្រី្ត១២នាក់ ។ ដោយមុន​នឹងគូ​គំនូរ​ក្រុមប្រត្តិបត្តិ​សាខា ​បានធ្វើការ​ផ្សព្វផ្សាយ​ដល់សាលា​ទាំង ៣​ ដើម្បីទទួល​ការណែនាំ​អំពី​ការគូរ​គំនូរ​ទាក់ទង​ទៅនឹង​ប្រធានបទ​ខាងលើ​ដោយសំដៅ​ទៅលើ​អត្ថន័យ​ សោភ័ណភាព​ និងស្នាដៃ​តាមស្ថានភាព​ជាក់ស្តែង​ជាលក្ខណៈបុគ្គល​ ផ្តោត​ លើនិមិត្ត​សញ្ញា​កាកបាទក្រហម ។ ក្រោយពី​បានវាយ​តម្លៃ​រូបភាព​នីមួយៗ​ បានទទួល​ចំណាត់​ថ្នាក់លេខ​ ១ ទៅលើ​សិស្ស​ឈ្មោះ ហ៊ន ធាន សិស្សថ្នាក់ទី ៦ (ក)សាលាបឋមសិក្សាស្វាយជ្រំ លេខ ២ ឈ្មោះ សំ ឆដា សិស្សថ្នាក់ទី ៦ (ខ) សាលាបឋម​សិក្សាអនុវត្តន៍ និងលេខ ៣ ឈ្មោះ ពេជ្រ ម៉ូលី​ណា សិស្ស​ថ្នាក់ទី ៦ (ខ)សាលា​បឋមសិក្សា​អនុវត្តន៍ ។

 

ក្នុងពិធី​នោះដែរ​លោកជំទាវ ​ពៅ សុភាព បានផ្តល់​ប័ណ្ណ​សរសើរ ​និងរង្វាន់​សំភារៈសិក្សាជា​អនុស្សាវរីយ៍១កញ្ចប់ដល់សិស្ស​ដែលជាប់​ចំណាត់ថ្នាក់​លេខ១ និងថវិកា៥ ម៉ឺនរៀល លេខ២ ថវិកា៤ ម៉ឺនរៀល និងលេខ៣ ថវិកា៣ ម៉ឺនរៀល និងសិស្សានុសិស្ស​ដែលមិនបាន​ទទួល​ជ័យ​លាភីទទួល​បានសំភារៈ​សិក្សា​ និងថវិកា២ ម៉ឺនរៀលក្នុងម្នាក់ៗ ។

អានបន្ថែម...

សាខាកក្រកខេត្តស្ទឹងត្រែង ៖ កាលពី ថ្ងៃទី ២០ -២១  ខែមីនា  ឆ្នាំ២០១៧  សាខាកាកបាទ ក្រហមកម្ពុជាខេត្តស្ទឹងត្រែង បានរៀបចំ វគ្គបណ្ដុះបណ្ដាលជាមូលដ្ឋានដល់យុវជនកាកបាទ​ក្រហម​កម្ពុជា​ចំនួន៨០​ នាក់​ នៃវិទ្យាល័យ​ ហ៊ុន សែន​ ស្ទឹងត្រែង​ ដោយមាន​ការអញ្ជើញ​ចូលរួម​ពីលោក​ សាយ ព្រលឹង នាយក​សាខា​កក្រក​ខេត្តស្ទឹងត្រែង​ តំណាង​មន្រ្តី​ការិយាល័យ​អភិវឌ្ឍន៍​ទីស្នាក់ការ​កណ្ដាល​ នាយករង​សាខា​ និងនាយករង​វិទ្យាល័យ ​ហ៊ុន សែន​ ស្ទឹងត្រែង ​ជាគណៈអធិបតី​ក្នុង​ពិធី​បើក-បិទវគ្គបណ្ដុះ​បណ្ដាល​ជាមូលដ្ឋាន​ និង​បំពាក់​ឯកសណ្ឋាន​ជូន​យុវជន​កាកបាទ​ក្រហម​កម្ពុជា​ថ្មីចំនួន​៨០ នាក់ ផងដែរ។

 

វគ្គ​បណ្ដុះបណ្ដាល​នេះរៀបចំ​ឡើង​ក្នុងគោល​បំណង​បញ្ជ្រាប​ចំណេះដឹង​ពាក់ព័ន្ធ ​ពង្រឹង​សមត្ថភាព ​និងតួនាទី​របស់​យុវជន កក្រក ក្នុង​ការចូលរួម​សកម្មភាព​មនុស្សធម៌ ​ប្រកប​ដោយប្រសិទ្ធភាព​និរន្តរន៍ភាព ​តាមរយៈកាកបាទក្រហម​កម្ពុជា។ វគ្គបណ្ដុះបណ្ដាល​នេះផ្ដោត​សំខាន់​លើប្រធាន​បទរួមមាន៖
-ប្រវត្តិចលនា​កាកបាទក្រហម ​អឌ្ឍចន្ទក្រហម ​និងច្បាប់មនុស្សធម៌អន្ដរជាតិ
-មូលដ្ឋានគ្រឹះនៃវិជ្ជាសង្គ្រោះបឋម
-ការងារគ្រប់គ្រងក្លឹបយុវជន និងគោលនយោបាយ យុវជន កក្រក និង
-ស្ថានភាពសុវត្ថិភាពចរាចរណ៍ផ្លូវគោក

បន្ទាប់ពី​ទទួលបាន​វគ្គបណ្ដុះបណ្ដាល​ជាមូលដ្ឋាន​នេះ យុវជនកក្រកថ្មីទាំងអស់នឹងត្រូវ​ចូលរួម​បំពេញសកម្មភាព​មនុស្សធម៌ ការងារ​សង្គម ​ការងារ​បរិស្ថាន​ អនាម័យ​ នៅក្នុងពិធី​បុណ្យ​ទន្លេ ​ដែលប្រព្រឹត្ត​នៅក្រុង​ស្ទឹងត្រែង នាពេល​ខាងមុខនេះ៕

 

អានបន្ថែម...

សាខាកក្រក​ខេត្ត​ព្រះវិហារ​៖កាលពី​ថ្ងៃទី១៨ ​ខែ មីនា ​ឆ្នាំ ​២០១៧ ​សាខា​កាកបាទក្រហម​កម្ពុជាខេត្តព្រះវិហារ​ បានបើក​វគ្គបណ្តុះបណ្តាល​ជាមូលដ្ឋាន​ និង​បំពាក់កន្សែង​ដល់​យុវជន​កាកបាទក្រហ​មកម្ពុជា​ វិទ្យាល័យ​រវៀង​ចំនួន៥០នាក់ ស្រី២៥នាក់ នៅវិទ្យាល័យរវៀង ឋិតក្នុងឃុំងរឿង ស្រុករវៀង។

 

ពិធីមាន​ការចូលរួម​ពីសំណាក់​លោកជំទាវ​ ចឹកហេង​ ប្រធាន​គណៈកម្មាធិការ​សាខា​កាកបាទក្រហម​កម្ពុជា​ខេត្តព្រះវិហារ​ និងមាន​ការចូលរួម​ពីក្រុម​ប្រតិបត្តិ​សាខា ​លោកនាយក​វិទ្យាល័យ​រវៀង​ និងទីប្រឹក្សាយុវជន។

 

នៅក្នុង​ឱកាសនោះ​ផងដែរ​លោកជំទាវ​ ចឹក ហេង ​ប្រធាន​គណៈកម្មា​ធិ ការ​សាខា​កាកបាទ ក្រហម​កម្ពុជា​ ខេត្តព្រះវិហារ​ មានប្រសាសន៍​ថា​កាកបាទ​ក្រហម​កម្ពុជា ក្រោមការ​ដឹកនាំ​របស់​ សម្តេច​កិត្តិព្រឹទ្ធបណ្ឌិត​ ប៊ុន រ៉ានី ហ៊ុនសែន ជាប្រធាន សម្តេច​តែងតែ​គិតគូរ​ពីយុវជន​ ធ្វើយ៉ាងណា​អោយ​យុវជន​ក្លាយជាធនធាន​ដ៏មាន​សមត្ថភាព ចូលរួមក្នុង​សម្មភាព​មនុស្សធម៌ ​និងចូលរួម​ចំណែក​ក្នុងការ ​អភិវឌ្ឍន៍ប្រទេសជាតិ។ លោកជំទាវ​ក៏ បានផ្តាំផ្ញើ​ប្អូនៗយុវជន ​នូវចំនុច​មួយចំនួន​ដូចខាង ក្រោម៖

 

-ត្រូវខិតខំរៀន​សូត្រ​ដើម្បី​ក្លាយខ្លួន​ជាសិស្ស​គំរូ មិត្តល្អ កូនល្អ  ត្រូវជៀស​អោយឆ្ងាយ​ពីគ្រឿងញៀន ត្រូវគោរពច្បាប់ក្នុងពេលបើកបរ​   កុំប្រើគ្រឿងស្រវឹងក្នុងវ័យសិក្សាត្រូវចេះសាមគ្គីគ្នា​ ចេះជួយយកអសារគ្នាត្រូវរៀបចំ​ផែនការ​សកម្មភាព​សម្រាប់អនុវត្ត ​និងមានរបាយការណ៍​ជូនទៅអនុសាខា​អំពីសកម្មភាពរបស់ខ្លួន ចូលរួមធ្វើអនាម័យ​បរិស្ថាន​ក្នុងសាលា​ជាប្រចាំ ក្នុងនោះសាខា​កាកបាទក្រហម​កម្ពុជាខេត្តព្រះវិហារ​បានផ្តល់​ថវិកា​មូលនិធិ​ជូនក្លឹប​យុវជនកាកបាទក្រហមកម្ពុជា វិទ្យាល័យរវៀង ចំនួន ២០០,០០០ រៀលគត់

 

អានបន្ថែម...

ព័ត៌មានផ្សេងៗ